Astanada Saýd Arabııasy koroliniń jeke zattary kórermen nazaryna usynyldy

ASTANA. QazAqparat - Elordadaǵy Qazaqstannyń Ulttyq mýzeıine kelýshiler Saýd Arabııasynyń koroli Feısal ıbn Abdýl-Azızdiń jeke zattaryn kórý múmkinshiligine ıe boldy, dep habarlaıdy QazAqparat.

«Ál Feısal: Ádildik pen erlik joly» taqyrybymen ashylǵan kórmege sırek kezdesetin tarıhı jádigerler jáne korol Feısaldyń jeke zattary - sýyq qarý túrleri, nagradalary, muraǵat qujattary, fotosýretter qoıylǵan. Kórmeniń ashylý saltanatyna QR Memlekettik hatshysy Gúlshara Ábdiqalyqova, Saýd Arabııasynyń hanzadasy Túrkı ıbn Feısal Ál Saýd jáne elimizdiń Mádenıet jáne sport mınıstri Arystanbek Muhamedıuly qatysty.

«Bizdiń elordamyzǵa qosh keldińizder! Saýd Arabııasynyń koroli Feısal ıbn Abdýl-Azız kóptegen progressıvti zańdardy qabyldady. Ol zańdar elde búgingi kúnge deıin qoldanylýda. Búgin kórmege kelýshiler koroldiń jeke zattarymen, sonymen qatar tarıhı qujattarmen tanys bola alady», - dep atap ótti Gúlshara Ábdiqalyqova.

Saýd hanzadasy óz kezeginde Qazaqstan men Saýd Arabııasy arasynda erekshe qarym-qatynas ornaǵandyǵyn basa aıtty.

«Korol Ál Feısaldyń jeke zattarynyń Qazaqstanda alǵash ret kórsetilip otyrǵandyǵyn atap ótken oryndy. Qazaqstan men Saýd Arabııasyn tek qana dıplomatııalyq qarym-qatynastan bólek te salalar baılanystyryp jatyr. Saýd Arabııasy koroli men Qazaqstan Prezıdenti arasyndaǵy qarym-qatynas ta óte jaqsy damý ústinde. Astanaǵa kelý arqyly biz Qazaqstannyń bolashaǵy zor ekendigine taǵy da bir márte kóz jetkizdik. Qazaqstan elordasyna kelgenime jáne QR Ulttyq mýzeıinde kórme ótkizgenime qýanyshtymyn», - dedi Saýd Arabııa hanzadasy Túrkı ıbn Feısal Ál Saýd.