Astanada sapasyz medıtsınalyq qyzmet kórsetkenderden 1,7 mlrd teńge óndirilgen

ASTANA. QazAqparat – Jyl basynan beri halyqqa kórsetilgen medıtsınalyq qyzmetterdiń sapasy men kólemine júrgizilgen monıtorıng nátıjesinde 366 029 kemshilik anyqtalyp, 1 mlrd 737 mln teńge óndirildi. Muny búgin elordada BAQ ókilderiniń qatysýymen ótken brıfıngide «Áleýmettik medıtsınalyq saqtandyrý qory» KEAQ Astana qalalyq fılıalynyń dırektory Nurlybek Qabdyqaparov aıtty, dep habarlaıdy QazAqparat tilshisi.

«Halyqqa kórsetilgen medıtsınalyq qyzmetterdiń sapasy men kólemine monıtorıng júrgizý jalǵasyp jatyr. Astana qalasy boıynsha bıylǵy 10 aıda kórsetilgen medıtsınalyq qyzmet sapasy men kólemine júrgizilgen túrli monıtorıngiler aıasynda 366 029 kemshilik anyqtalyp, 1 mlrd 737 mln 298 myń teńge óndirildi.

Al, monıtorıng nátıjesinde mindetti áleýmettik medıtsınalyq saqtandyrý júıesinde 359 820 kemshilik anyqtalyp, 1 mlrd 105 mln 426 myń teńge qarajat óndirildi», - dep atap ótti Nurlybek Qabdyqaparov.

Qosa keteıik, buǵan deıin MÁMS júıesinde elordalyqtardyń 82 paıyzy saqtandyrylǵanyn habarlap edik. Sondaı-aq, Astana turǵyndary 5 jylda MÁMS júıesine 157,8 mlrd teńge aýdarǵan.