Astana sammıtinen bastap ShYU tolyqqandy «Shanhaı ondyǵy» formatynda jumys isteıdi
«Óz basym Shanhaı yntymaqtastyq uıymymen erekshe qarym-qatynasta bolǵanymnan bastaıyn. 1996 jyly sáýirde onyń qurylýyna, kelissózderge jáne qujattardy daıyndaýǵa qatysýǵa múmkindigim boldy. «Shanhaı bestigi» qurylýynyń bastaýynan-aq óziniń órshildigin kórsetti jáne búgingi kúnge deıin saqtalyp otyrǵan negizgi maqsaty – senim sharalaryn arttyrý tóńireginde qalyptasty. Osy jyldyń 3 shildesinde, shırek ǵasyrdan sál astam ýaqyttan keıin Shanhaılyq úlken otbasynyń jıyny Qazaqstanǵa oralýy óte sımvolıkalyq mánge ıe. Osy jyldar ishinde «Shanhaı bestiginiń» quramy eki esege ulǵaıyp, Astanadaǵy sammıtten bastap Uıym tolyqqandy «Shanhaı ondyǵy» formatynda jumys isteı bastaıdy», - dedi Memleket basshysy.
Qasym-Jomart Toqaev ShYU-ǵa tóraǵalyq asa mańyzdy ári sonymen birge óte jaýapty mıssııa ekenin erekshe atap ótti.
«Uıymnyń negizin qalaýshylardyń biri jáne kópjaqty dıalogty damytýdyń belsendi qoldaýshysy retinde Qazaqstan Uıymdy óziniń teńgerimdi syrtqy saıasatyndaǵy turaqty basymdyq retinde qarastyrady. Tóraǵalyǵymyzdyń qaǵıdattary men keń aýqymdy kún tártibin ázirleý kezinde de dál osy ýájder basshylyqqa alyndy. Bizdiń kúsh-jigerimiz qaýipsizdik máselelerin sheshýdiń ortaq tásilderin ázirleýge, saýda-ekonomıkalyq yntymaqtastyqty nyǵaıtýǵa, ekologııany qorǵaýǵa járdemdesýge jáne halyqtarymyz arasyndaǵy dostyq baılanystardy nyǵaıtýǵa baǵyttalatyn bolady», - dedi Qasym-Jomart Kemeluly.
Prezıdenttiń atap ótýinshe, Uıymnyń iri halyqaralyq jáne óńirlik qurylymdarmen baılanysyn keńeıtý arqyly onyń halyqaralyq bedelin odan ári nyǵaıtý mańyzdy mindet sanalady. Qazirdiń ózinde 150-den astam is-shara ótkizildi: Nıý-Iorkten Beıjińge, Naırobıden Máskeýge deıin. Osylaısha, ShYU seriktesteriniń aıasy keńeıip, quqyqtyq baza birqatar qujatpen tolyǵady.
«Tóraǵalyǵymyzdyń sharyqtaý shegi Astanadaǵy sammıt bolady, oǵan biz basa kóńil bólemiz. Biz ShYU-ny odan ári jetildirý salasynda strategııalyq mańyzdy sheshimder qabyldanady dep kútemiz. Orta merzimdi keleshekke arnalǵan ózara is-qımyldyń negizgi baǵyttary aıqyndalyp, aǵymdaǵy syn-qaterler men qaýipterge barabar jáne ýaqtyly den qoıý úshin bastamalar ázirlenetin bolady. Osy múmkindikti paıdalana otyryp, ShYU-ǵa múshe barlyq memleketke Qazaqstan tóraǵalyǵynyń bastamalaryn qoldaǵany, usynystarymyzben nıettestikteri jáne biz usynǵan basymdyqtar aıasyndaǵy birlesken jumysy úshin shynaıy alǵysymdy bildirgim keledi. Sammıttiń qorytyndy sheshimderinde «Shanhaı rýhynyń» irgeli qaǵıdattary – ózara senim, dostyq, ózara tıimdilik jáne bir-biriniń múddelerin eskerý tolyq qamtylady dep kútemiz», - dedi Prezıdent.