Astanada salyq organynyń sheneýnigi kásipkerden 3,6 mln teńge para alǵan

<p>ASTANA. KAZINFORM — Para alǵany úshin memlekettik kirister organynyń bólim basshysy sottaldy. </p>

Astana qalasynyń qylmystyq ister jónindegi aýdanaralyq soty memqyzmetshiniń para berýshiniń paıdasyna qyzmettik ókilettikterine kiretin áreketi úshin aıtarlyqtaı mólsherde para alý (QK 366-babynyń 2-bóligi) faktisi boıynsha T-ǵa qatysty qatysty isti qarady.

T. Qarjy mınıstrliginiń Astana qalasy boıynsha memlekettik kirister departamenti janama salyqty ákimshilendirý basqarmasynyń bólim basshysy laýazymyn atqara otyryp, qaramaǵyndaǵylar arqyly «S» JShS dırektorynan artyq tólengen qosylǵan qun salyǵyn qaıtarǵany úshin 3 600 000 teńge kóleminde para alady.

Sottalýshynyń kinási óziniń qylmystyq áreketin moıyndaýymen, kýágerlerdiń aıǵaqtarymen, zattaı dáleldemelermen jáne is materıaldarymen dáleldendi.

Prokýror qosymsha jaza taǵaıyndaı otyryp 4 jylǵa bas bostandyǵynan aıyrý jazasyn surady.

Sottalýshy óz kinásin tolyq moıyndap, aıyppul salýdy surady.

QK-niń 366-babynyń 2-bóliginiń sanktsııasy múlki tárkilenip, belgili bir laýazym atqarý nemese belgili bir qyzmetpen aınalysý quqyǵynan ómir boıyna aıyra otyryp, paranyń 50-den 60 eselengenge deıingi somasy mólsherinde aıyppul salý ne 3 jyldan 7 jylǵa deıingi merzimge bas bostandyǵynan aıyrý jazasyn kózdeıdi.

Sot jaza taǵaıyndaý kezinde sottalýshynyń shyn nıetpen ókinýin, jas balalarynyń bar ekenin jáne sottalmaǵanyn jeńildetetin mán-jaı dep tanydy.

Sottalýshynyń qylmysty antyn buza otyryp jasaýy aýyrlatatyn mán-jaı dep tanyldy.

Sottalýshy jasaǵan sybaılas jemqorlyq qylmystyń aýyrlyǵyn, memlekettik qyzmetshilerge degen senimdi túsirgenin jáne oǵan nuqsan keltirgenin, sondaı-aq jeńildetetin jáne aýyrlatatyn mán-jaıdyń bar ekenin eskere otyryp, sot oǵan memlekettik qyzmette jáne kvazımemlekettik sektor sýbektilerinde qyzmet atqarý quqyǵynan ómir boıyna aıyra otyryp, 3 jyl 6 aı merzimge bas bostandyǵynan aıyrdy.

Sondaı-aq, sot is boıynsha anyqtalǵan aýyr sybaılas jemqorlyq qylmys jasaýǵa yqpal etken sebepter men jaǵdaılarǵa nazar aýdarylyp, tıisti shara qabyldaý úshin Astana qalasy boıynsha MKD basshysynyń atyna jeke qaýly shyǵardy.

Úkim zańdy kúshine engen joq.