Astanada «Rýhanı jańǵyrý» baǵdarlamasyn júzege asyrýdyń aspektileri qaraldy

ASTANA. QazAqparat - Búgin «University Medical Center» korporatıvtik qorynyń májilis zalynda Astana qalasynyń qoǵamdyq kelisim keńesiniń «Qoǵamdyq sanany jańǵyrtý baǵdarlamasyn iske asyrýdyń tıimdi quraly» atty kezdesý ótti, dep habarlaıdy Astana qalasy ákimdiginiń resmı saıty.

Іs-sharaǵa Astana qalasynyń qoǵamdyq kelisim keńesteri, Analar keńesi, Esil aýdanynyń ardagerler keńesi, qalanyń qoǵam qaıratkerleri jáne etnomádenı birlestikterdiń basshylary qatysty.

Kezdesý barysynda «Rýhanı jańǵyrý» baǵdarlamasyn júzege asyrýdyń túrli aspektileri qaraldy, osy tusta spıkerler Memleket basshysynyń «Bolashaqqa kózqaras: qoǵamdyq sanany jańǵyrtý» maqalasyna kóbirek nazar aýdardy. Sondaı-aq ulttyq sáıkestik pen kelisimniń damýy mańyzdy ekenin jáne de Qazaqstan halqy assambleıasynyń etnıkaaralyq dıalog qalyptastyrýdaǵy roline toqtala ketti. 

«Jyl boıy biz ulttyq dástúrdi, tarıhty, patrıottyq tárbıeni saqtaýǵa jáne mádenıetke kóńil bólip talqylaımyz. «Bolashaqqa kózqaras: qoǵamdyq sanany jańǵyrtý» maqalasynda memleketimizdiń tarıhy men ólkemizdiń tarıhyna kóbirek kóńil bólingen. Rasynda biz óz tarıhymyzdy bilmeı, eshqashan alǵa qaraı jyljı almaımyz, sebebi qoǵamdyq sana eń aldymen ata-babalarymyz jasap ketken mádenıetke, energetıkalyq ulttyq kodqa, jadymyzǵa júginedi», - dedi Qoǵamdyq kelisim keńesiniń tóraǵasy Ámirjan Álpeıisov. 

Sondaı-aq otyrysta Qazaqstan Respýblıkasynyń Memlekettik qyzmet isteri jáne sybaılas jemqorlyqqa qarsy is-qımyl agenttiginiń Astana qalasy boıynsha departamentiniń ókilderi densaýlyq saqtaý salasynda jáne qoǵamdaǵy ishki jemqorlyqqa qarsy is-qımyl máselelerin de talqyǵa saldy. 

Esterińizge sala keteıik, 2013 jyly Qazaqstan halqy Assambleıasynyń XX sessııasynyń sheshimi boıynsha Qazaqstannyń barlyq óńirinde qoǵamdyq kelisim keńesteri quryldy, 2016 jyldan bastap Astana qalasynda 6 keńes qurylǵan.