Astanada reıske keshikken jolaýshy áıel kompanııa qyzmetkerin balaǵattap, qol jumsaǵan

ASTANA. QazAqparat - FlyArystan 23 shildede bolǵan oqıǵaǵa pikir bildirdi. Sol kúni jolaýshy Astana-Shymkent reısine keshigip kelgen edi. Keıin reıske jiberýdi talap etken áıel adam FlyArystan qyzmetkerin balaǵattap, soqqylaǵan, dep habarlaıdy QazAqparat.

Oqıǵanyń mán-jaıyn anyqtaý barysynda jolaýshy reıske tirkelý aıaqtalǵannan keıin keshigip kelgeni, sondyqtan ushaqqa ótkizilmegeni málim boldy.

Ashýǵa býlyqqan jolaýshy tirkeý ústelindegi aýyr zattardy tirkeý baǵanasynyń ar jaǵynda turǵan qyzmetkerlerge laqtyryp, balaǵat sózder aıtqan.

Áýekompanııa ókilderiniń birine aýyr dene jaraqatyn salǵan.

Qazirgi ýaqytta áýekompanııa qyzmetkerge barynsha qoldaý kórsetip jatyr, sonymen qatar destrýktıvti jolaýshyny jaýapkershilikke tartpaqshy.

«Áýekompanııa ókilderi birinshi kezekte tulǵa retinde adamǵa qurmetpen qaraıtyn qarym-qatynasta jumys isteýge quqyly. Olardyń densaýlyǵyna zııan kelmeýi tıisti. Sondyqtan, jolaýshylardan tártipti buzbaı, syılastyq tanytýdy suraımyz. Sonymen qatar, 170 jolaýshy keshigip kelgen bir adamdy kúte almaıtynyn eskergen jón. Bul jaǵdaıǵa qatysty jolaýshy zańdy túrde jaýapkershilikke tartylady jáne de áýekompanııa qyzmetterin paıdalana almaıdy degen senimdemiz», - dedi FlyArystan basqarýshy dırektory Edrıan Hamılton-Manns.

Kompanııa reıske ýaqtyly kelý erejesi men merzimi Qazaqstan zańnamasymen bekitilgenin eske saldy.