Astanada respýblıkalyq aıtys jeńimpazdary anyqtaldy
Sóz saıysyna talaı báıgede top jaryp, jurtshylyqtyń rızashylyǵyna bólenip júrgen Aıbek Qalıev, Bekarys Shoıbekov, Tólegen Jamanov, Birjan Baıtýov, Rústem Aqylbekov bastaǵan 14 aqyn qatysty.
Ádil qazylar alqasynyń quramynda Qazaqstannyń eńbek sińirgen qaıratkeri Ǵalym Jaılybaı, aqyn Ásııa Berkenova, fılologııa ǵylymdarynyń doktory Qoılybaı Asanov, Senat depýtaty Nurtóre Júsip, Májilis depýtaty Janarbek Áshimjan, Halyqaralyq «Alash» syılyǵynyń laýreaty Dáýletkereı Kápuly men «Habar Agenttigi» aktsıonerlik qoǵamynyń basqarma tóraǵasy Berik Ýálı boldy.
«Meniń kótergen máselem Jańa Qazaqstanǵa baılanysty boldy. Elde birqatar ózgeris oryn aldy. Osy tóńirekte negizgi aıtpaǵym «kóp dúnıeniń atyna emes, zatyna mán bereıik» degen taqyrypta ózekti bolyp turǵan Ulytaý, Jańaarqa aýdanyndaǵy áleýmettik máselelerge nazar aýdaraıyq, jańǵyraıyq degen oı boldy. Ózderińiz biletindeı, bıyl ult kósemi Ahmet Baıtursynulynyń mereıtoıy atalyp ótip jatyr. Alash arysy, ádebıettiń atasy dep aıtylǵanymen, kósemniń saıası qaıratkerlik qyryn da kórsetýge tyrystym», – dedi Ulytaý oblysynan kelgen aqyn Tólegen Jamanov.
Nátıjesinde bas júlde – 3 mıllıon teńgeni Meıirbek Sultanhan ıelendi.
I oryndy (2 mln teńge júlde) Bekarys Shoıbekov, II oryndy (1,5 mln teńge) Tólegen Jamanov, III oryndy (1 mln teńge) Aıbek Qalıev, Rústem Qaıyrtaı, Nurbol Jaýynbaı, Nurmahan Jaqypbek jeńip aldy.