Astanada Polsha táýelsizdiginiń 100 jyldyǵy atalyp ótti

ASTANA. QazAqparat - QR Tuńǵysh Prezıdenti - Elbasy kitaphanasynda Polsha Respýblıkasynyń Qazaqstandaǵy Elshiligi jáne Ulttyq estelik ınstıtýtymen (Polsha) birlese uıymdastyrǵan «HVІІІ-HH ǵasyrlardaǵy Polsha tatarlarynyń Polsha táýelsizdigi úshin kúresi» atty halyqaralyq ǵylymı-tájirıbelik konferentsııasy ótti, dep habarlaıdy QazAqparat tilshisi.

Konferentsııa jumysyna sheteldik jáne otandyq ǵalymdar, zertteýshiler, Astananyń joǵary oqý oryndarynyń stýdentteri, Elbasy kitaphanasynyń qyzmetkerleri, Polshanyń Qazaqstandaǵy elshiligi men basqa da dıplomatııalyq ókilder qatysty.

Elbasy kitaphanasy dırektorynyń birinshi orynbasary, saıası ǵylymdarynyń doktory Ámirhan Rahymjanov óziniń alǵy sózinde «Polsha men Qazaqstandy elimizdegi myńdaǵan polıak dıasporasy, eki halyqtyń tarıhı taǵdyrlarynyń ortaqtaǵy, sonymen qatar óte jaqyn rýhanı ári mádenı jáne gýmanıtarlyq qarym-qatynastar baılanystyratynyn» atady.

«Qazaqstandyq-polshalyq qarym-qatynastyń tarıhy tereńde jatyr. Polsha tarıhy uly jáne tragedııalyq paraqtarǵa toly. HІH ǵasyrda Qazaqstan aýmaǵyna Reseı patshalyǵynan derjavanyń saıası qarsylastary aıdalyp ketip otyrǵan. Bostandyq úshin kúres jolyndaǵylardyń ishinde polıaktar da az bolǵan joq. Onyń ishindegi Adolf ıAnýshkevıch sekildi polıak etnograftary qazaq dalasyn belsendi túrde zerttep, qazaqtar týraly kóptegen etnografııalyq jazba qaldyrǵan. Onyń eńbekteri birneshe tilge aýdarylǵan. Sol sekildi polıak patrıoty Branıslav Zaleskıı de qazaq dalasyna jer aýdarylyp, bizdiń elimizdi 10 jyl aralap zerttegen», - dedi Ámirhan Rahymjanov.
 

Ótkendi aıta kele Ámirhan Rahymjanov búgingi qazaqstandyq-polshalyq qarym-qatynasqa da oıysty.

«Qazaqstan men Polshanyń dıplomatııalyq qarym-qatynasy 1992 jyldyń 6 sáýirinde jolǵa qoıǵan. 1994 jyldyń 20 naýryzynda Qazaqstandaǵy Polsha elshiligi ashyldy. Eki eldiń tıimdi qarym-qatynasy tek jaǵymdy baǵytta damyp keledi», - dedi ǵalym.
 

Sonymen qatar, konferentsııa barysynda Qazaqstan Respýblıkasyndaǵy Polshanyń Tótenshe jáne Ókiletti elshisi Selım Hazbıevıch pen Ulttyq estelik ınstıtýtynyń Belostok qalasyndaǵy fılıalynyń dırektory, tarıh ǵylymdarynyń doktory, professor Pıotr Kardela alǵy sózderin arnady. Olar óz baıandamasynda Polsha tatarlarynyń Polsha táýelsizdigi úshin kúresin tilge tıek etip, tarıhtan syr shertti.

Sondaı-aq, jıyn barysynda Polshanyń táýelsizdigine arnalǵan kórme ashyldy.