Astanada pırsten Esilge sekirgen 10 jasar oqýshy sýǵa batyp kete jazdady

ASTANA. QazAqparat - Ótken jeksenbide Astanada mektep oqýshysy sýǵa batyp kete jazdady, dep habarlaıdy QazAqparat Tótenshe jaǵdaılar mınıstrliginiń saıtyna silteme jasap.

4 maýsym saǵat 19:00-de jedel-qutqarý jasaǵynyń bas qutqarýshylary Konstantın Novokshanov pen Ómirbaı Nurjan Esil ózenindegi «Akbulak Riviera» TK aýmaǵyn patrýldeý barysynda pırsten sýǵa sekirgen balany kórgen.

Oqıǵa ornyna jedel kelip, úılesimdi jáne kásibı is-qımyldyń arqasynda 2013 jyly týǵan bala sýdan aman-esen qutqarylyp, alǵashqy medıtsınalyq kómek kórsetildi.

Bul jaǵdaıdyń sońy jaqsy aıaqtaldy, biraq árdaıym osylaı bola bermeýi múmkin.

«Qurmetti ata-analar, Astana qalasynyń TJ departamenti sizdi kezekti ret qyraǵy bolýǵa, ruqsat etilmegen oryndarda shomylmaýǵa, sý aıdyndaryndaǵy qaýipsizdik erejelerin buzbaýǵa, mas kúıinde shomylmaýǵa, balalardy qaraýsyz qaldyrmaýǵa, kópirler men qaıyqtardan, pırsterden sýǵa sekirmeýge, qorshaý belgilerinen ary júzbeýge shaqyrady. Ózińizdi jáne balalaryńyzdy qorǵańyz» dep eskertedi TJD.