Astanada ótip jatqan azamattyq forýmda qandaı máseleler talqylanady

<p>Elordada Qazaqstannyń XI Azamattyq forýmy bastaldy. Oǵan 600-den astam azamattyq belsendi, ÚEU kóshbasshylary, qoǵamdyq keńes tóraǵalary, Parlament depýtattary, memlekettik organdardyń, bıznestiń, óńirlik jáne ulttyq damý ınstıtýttarynyń ókilderi jınaldy, dep habarlaıdy<a href="https://kaz.inform.kz/" target="_blank" rel="noopener"> Kazinform.&nbsp;</a></p>

Mádenıet jáne aqparat vıtse-mınıstri Danııar Qadyrov Azamattyq forýmnyń Qazaqstan úshin óte mańyzdy ýaqytta – Respýblıka kúni qarsańynda ótkizilip jatqanyn aıtty.

«Memleket basshysy azamattyq qoǵamdy damytýǵa basa nazar aýdarady. Bizdiń elimizdiń barlyq jetistikteri sizderdiń (azamattyq qoǵam – red.) eńbekterińiz ben úlesterińizdiń arqasynda. Sizder ózderińizdiń ómirlik ustanymdaryńyzben bılik pen halyq arasyndaǵy kópirge aınaldyńyzdar. Sizder halyq únine qulaq asatyn memleket tujyrymdamasyn júzege asyryp kelesizder. Belsendi azamattyq qoǵam elimizdiń ekonomıkalyq, áleýmettik jáne saıası damýyna erekshe úles qosady», - dedi Danııar Qadyrov forýmnyń ashylý saltanatynda.

Onyń aıtýynsha, azamattyq sektor eldegi kóptegen ózgeristiń bastamashysy bolyp otyr. 

Foto: Soltan Jeksenbekov/ Kazinform

«Memleket basshysy zań ústemdigin birinshi orynǵa qoıady. Sondyqtan sizder kóptegen ózgeristiń bastamashysy bolǵandaryńyzdy aıtqym keledi. Óıtkeni zań jobalary qoǵamdyq talqylaýdan ótedi. Sizder bastapqyda-aq jumys tobynyń múshesi bolyp, tolyqtyrýlar men ózgerister engizesizder, sodan keıin olar zań jobalarynyń normasyna aınalady», - dep tolyqtyrdy vıtse-mınıstr.

Qazaqstan Azamattyq alıansynyń prezıdenti Baný Nurǵazıeva eń alǵashqy Azamattyq forým 20 jyl buryn ótkenin eske saldy. 

Foto: Soltan Jeksenbekov/ Kazinform

«Qazirgi ýaqytta biz túbegeıli ózgerdik, myqty jáne kemeldengen azamattyq qoǵamǵa aınaldyq. Búgin osy zalda belsendi ómirlik ustanymy bar adamdar, qoǵam máselelerine beıjaı qaramaıtyn jandar otyr. Eldiń damýyna, ár otbasynyń ál-aýqatyna úles qosatyndardyń barlyǵyna shyn júrekten alǵys aıtqym keledi. Qazaqstannyń XI Azamattyq forýmynyń basty aıyrmashylyǵy 20 óńirlik forým uıymdastyrý boldy. Maǵan elimizdiń 20 óńirindegi árbir forýmdy kórý baqyty buıyrdy. Olardyń árqaısysy laıyqty deńgeıde ótti», - dedi Baný Nurǵazıeva.

Alıans prezıdenti árbir forýmǵa óńir ákimderi qatysqanyn atap ótti. Onyń pikirinshe, bul memleket pen qoǵamnyń birtutas bolǵanyn kórsetedi.

Azamattyq forým sheńberinde halyqaralyq trenerlerdiń qatysýymen sheberlik synyptary, áleýmettik jobalardyń kórme-tusaýkeserleri, dıalog alańdary, qaıyrymdylyq salasyndaǵy ataqtar, sondaı-aq «Tańdaý» respýblıkalyq qoǵamdyq syılyǵy tabys etiledi jáne áriptestik kelisimder men memorandýmdarǵa qol qoıylady.

Baný Nurǵazıeva azamattyq forýmnyń eki jylda bir ret ótetinin aıtty. Búgingi kúnniń qorytyndysy boıynsha forýmǵa qatysýshylardyń usynymyn eskere otyryp, Qazaqstan Respýblıkasynda azamattyq qoǵamdy damytý tujyrymdamasyn iske asyrý jónindegi Jalpyulttyq jospar qabyldanady.