Astanada ótken jármeńkede 400-den asa bos jumys orny usynyldy

<p>Astanadaǵy &laquo;Jastar&raquo; saraıynda kezekti jalpyqalalyq bos oryndar jármeńkesi ótti, dep habarlady <a href="https://kaz.inform.kz/" target="_blank" rel="noopener">Kazinform</a> elorda ákimdiginiń resmı saıtyna silteme jasap.&nbsp;</p>

Eńbek mobıldiligi ortalyǵy uıymdastyrǵan jármeńkege 80-ge jýyq jumys berýshi qatysyp, olar kelýshilerge 400-den astam bos jumys ornyn usyndy.

Mansap ortalyǵynyń basshysy Baǵıla Orynbetovanyń sózinshe, jyl sońyna deıin taǵy 3 jármeńke ótedi.

«Jyl basynan beri elordada barlyq sanattaǵy jumyssyz azamattarǵa arnalǵan 8 iri bos oryndar jármeńkesi ótti. Búgin osyndaı aýqymda sońǵy ret ótip tur. Biraq jospar boıynsha taǵy 3 shaǵyn bos oryndar jármeńkesi uıymdastyrylady. Ózderińiz kórip otyrǵandaı, bul jerde túrli sala qamtylǵan. Onyń ishinde qurylys, bilim, qarjy jáne iri mekemeler men kásiporyndar qatysyp otyr», - deıdi Baǵıla Orynbetova.

Bos oryndar jármeńkesi eki qolǵa bir kúrek tappaı júrgenderge jumys tabýǵa múmkindik beredi. Olar jumys berýshilermen sóılesip, óz túıindemelerin usyndy.

«Osyndaı iri qalalyq jármeńkeler jumys izdep júrgenderge úlken kómek. Jumys berýshiler de ózderine qajetti mamandy tez tabady. Búgin ózim «Menedjment, Bıznes jáne Bilim kolledji» atynan kelip otyrmyn. Kadr bóliminiń basshysymyn. Bizdiń kolledjge ekonomıka jáne qazaq tili muǵalimderi qajet. Talabymyz – eki tilde, ıaǵnı qazaqsha jáne oryssha sabaq ótkize alatyn bolýy tıis. Joǵary bilimdi jáne eńbek ótili bolǵany abzal. Jármeńke sońyna deıin jumys izdep júrgen jandarmen sóılesip, túıindeme qabyldaıtyn bolamyz», - deıdi «Menedjment, Bıznes jáne Bilim kolledji» kadr bóliminiń basshysy Qyzǵaldaq Aıtımova.

Sondaı-aq jármeńke barysynda «Jastar praktıkasy», «Alǵashqy jumys», «Urpaqtar kelisimsharty» baǵdarlamalar kásiptik oqytý jáne «enbek.kz» portalymen jumys isteý jóninde keńes berý boıynsha Mansap ortalyqtarynyń mamandary túsindirý jumysyn júrgizdi.