Astanada ótken «Otbasy duatlon 2022» jarysyna 109 otbasy qatysty

ASTANA. QazAqparat - Astanadaǵy Trıatlon saıabaǵynda ótken otbasylyq dýatlonǵa 109 otbasy qatysty, dep habarlaıdy QazAqparat qala ákimdiginiń resmı saıtyna silteme jasap.

Atalǵan saıys Balalar jylyna oraı Astana qalasy ákimdiginiń qoldaýymen jáne qalalyq Dene shynyqtyrý jáne sport basqarmasynyń uıytqy bolýymen uıymdastyryldy. Oǵan nıet bildirgen barlyq otbasy qatysa aldy.

«OTBASY DUATLON 2022» jarysy dástúrge aınaldy. Bıyl altynshy ret ótkizip otyrmyz. Qatysýǵa nıet bildirgen otbasylar sany edáýir artty. Keler jyly 5-6 jastaǵy balalardy qospaqshymyz. Jarysqa qatysýǵa ótinimder aldyn ala elektrondy túrde qabyldandy, mindetti túrde shlem men dári­gerdiń ruqsaty bolýy kerek», - deıdi Astana qalasynyń Dene shynyqtyrý jáne sport basqarmasynyń basshysy Samat Jylqybaev.

Jarys sporttyń 2 túrinen úsh qashyqtyqta ótti. Dıstantsııanyń jalpy uzyndyǵy – 4,5 shaqyrym.

Balalar úshin úsh sanat – 8-9, 10-11 jáne 12-13 jas belgilendi.

Aldymen 2,1 qashyqtyqqa ákeler júgirdi, odan ári estafetany velosıpedke mingen analar aldy. Jarysty balalar márege deıin 200 metr júgirýmen aıaqtady.

Qatysqan barlyq otbasyǵa medaldar tabystaldy. Al jeńimpazdar I, II, III oryn dıplomdaryn jáne teledıdar, mıkrotolqyndy pesh, shańsorǵysh, termopot, smartfon, smart-saǵat, velosıped sekildi baǵaly syılyqtar aldy.

Foto: gov.kz