Astanada ótetin tsıfrlyq halyqaralyq konferentsııadan paıda bar ma – mınıstr jaýaby
«Halyqaralyq konferentsııany ótkizý týraly sheshim byltyr qabyldandy, bıyl qyrkúıekte ótedi. Bul Qazaqstannyń emes BUU-nyń konferentsııasy jáne ony ótkizbesek, bedelimizge táýekel týyndaýy múmkin. Onyń aıasynda 62 eldiń mınıstrlerimen tsıfrlyq sheshimder ortalyǵyn qurý týraly deklaratsııaǵa qol qoıylady. Konferentsııany biz ótkizbesek, basqa el ótkizedi, sáıkesinshe tsıfrlyq ortalyq basqa elde qurylady. Meniń oıymsha, BUU-nyń ekojúıesin nyǵaıtý elimizdiń ortalyq habqa aınalý strategııasyna sáıkes keledi», - dedi Jaslan Mádıev vedomstvoda ótken baspasóz máslıhatynda Kazinform agenttigi tilshisiniń saýalyna jaýap bere otyryp.
Esesine mınıstr, bıyl elordada Digital Bridge halyqaralyq tehnologııalyq forýmynyń ótpeıtinin alǵa tartty. Sondaı-aq, J.Mádıev 62 eldiń mınıstrleriniń qatysýymen ótetin aýqymdy is-sharaǵa jumsalatyn qarajat jaǵyn da tilge tıek etti.
«Otandyq startapshylar aldaǵy halyqaralyq konferentsııaǵa óz jobalaryn tanystyryp, kórsetedi. Bul qarjy únemdeýge yqpal etedi, ıaǵnı shetelge baryp tanystyrýdyń qajeti joq. Sondyqtan bul konferentsııany ótkizý tıimdi dep oılaımyn, ony uıymdastyryp, ótkizýge 770 myń dollar qarastyrylǵan», - dep tolyqtyrdy vedomstvo basshysy.
Keshe Qazaqstanda 62 memlekettiń qatysýymen halyqaralyq konferentsııa ótetini týraly habarlaǵan edik.
Osy oraıda Májilis «Qazaqstan Úkimeti men Birikken Ulttar Uıymy arasyndaǵy tsıfrlyq ınklıýzııa jáne transformatsııa jónindegi Azııa-Tynyq muhıt mınıstrlik konferentsııasyn uıymdastyrý týraly kelisimdi ratıfıkatsııalaý týraly sheshim qabyldady.
Eske sala keteıik, Memleket basshysy elimizdiń birqatar óńirindegi sý tasqynyna baılanysty qalyptasqan kúrdeli jaǵdaıdy eskere otyryp, sondaı-aq bıýdjet qarjysyn únemdeý maqsatynda Úkimetke, ortalyq memlekettik jáne jergilikti atqarýshy organdarǵa ımıdjdik jáne basqa da iri is-sharalardy ótkizbeý jóninde tapsyrma bergen edi.