Astanada ótetin «Ortalyq Azııa – Reseı» sammıtine 6 prezıdent qatysady

ASTANA. QazAqparat – 14 qazan kúni elordada «Ortalyq Azııa-Reseı» sammıti ótedi. Bul týraly QR Syrtqy ister mınıstrliginiń resmı ókili Aıbek Smadııarov aıtty, dep habarlaıdy QazAqparat tilshisi.

«Joǵary deńgeıdegi kezdesý barysynda Qazaqstan, Qyrǵyzstan, Ózbekstan, Tájikstan, Túrikmenstan jáne Reseı prezıdentteri altyjaqty formattaǵy yntymaqtastyqtyń keleshegin talqylaıdy. Kezdesý qorytyndysy boıynsha memleket basshylarynyń Birlesken málimdemesin qabyldaý josparlanýda, onda Eýrazııalyq keńistiktegi óńirlik yntymaqtastyqtyń ózekti máseleleri kórsetiledi», - dedi Aıbek Smadııarov mınıstrlikte ótken brıfıngte.

Sondaı-aq qorytyndy qujatta saıasat pen qaýipsizdik, saýda-ekonomıkalyq jáne mádenı-gýmanıtarlyq yntymaqtastyq sııaqty salalardaǵy odan ári ózara is-qımyldyń perspektıvalary atap ótiledi.

Aıta keteıik, bul aptada elordada Azııadaǵy ózara is-qımyl jáne senim sharalary jónindegi keńestiń VI sammıti ótedi, oǵan 11 memlekettiń basshylary qatysady.

Sonymen birge, 14 qazanda Astanada TMD memleketteriniń basshylary kezdesedi. Sammıtte Qazaqstan 2023 jyly TMD-ǵa tóraǵalyq etýdi Qyrǵyz Respýblıkasyna tapsyrady.