Astanada ótemaqy tólep, jer telimderin memleket qajetine qaıtarý sharalary kóbeıgen - Astana soty

ASTANA. QazAqparat - Zertteý jumystary kórsetkendeı, Astana qalasy boıynsha jer telimderin memleket qajettilikteri úshin qaıtaryp alý sharalary jyl saıyn kóbeıip keledi.

Bul týraly búgin Astana qalalyq sotynda ótken «Jer telimderin memleket qajetine qaıtarý kezinde ótemaqy mólsherin belgileý máseleleri» taqyrybyndaǵy dóńgelek ústel otyrysynda Astana qalalyq sotynyń sýdıasy Qarlyǵash Tatkeeva aıtty.

Onyń málimetinshe, 2012 jyly osy sanattaǵy is 295 bolsa, 2013 jylǵy bul kórsetkish 524-ke jetken. Al 2014 jyldyń qańtarynda Astana qalasynyń sottaryna osy oraıdaǵy 40-tan astam is kelip túsken.

«Astana jyl saıyn qarqyndy damyp keledi. Aı saıyn jańa nysandar paıda bolýda. Sonymen qatar, eski ǵımarattar qoldanysqa jaramsyz bolyp qalýda. Sondyqtan da jer telimderin ótemaqysyn tóleı otyryp, memleket qajettilikterine qaıtaryp alý sharalary jyldan jylǵa kóbeıip keledi», - dep atap ótti Q. Tatkeeva.