Astanada otandyq eń úzdik startap jobalar marapattaldy

ASTANA. 16 mamyr. QazAqparat - Baıqaýdyń jeńimpazdary óz ıdeıalaryn iske asyrýǵa aqshalaı qoldaýmen qatar óziniń bıznesin qalaı qurý kerektigi jóninde oqytýdyń biregeı múmkindigin alady. Konkýrsty uıymdastyrýshy retinde QR Kólik jáne kommýnıkatsııa mınıstrliginiń qoldaýyna ıe bolǵan ınfokommýnıkatsııalyq tehnologııalardy damytý qory bastamashy boldy.

Atalǵan mınıstrliktiń málimetine qaraǵanda, ınfokommýnıkatsııalyq tehnologııalar salasyndaǵy eń úzdik ıdeıalar jónindegi ulttyq baıqaý ótken jylǵy qarasha aıynda bastalǵan edi, al qorytyndysyn bıylǵy sáýir aıynda jasap úlgerdi. Quramynda QR KKM-niń, «Ksell» AQ-nyń, «KaR-Tel» JShS-niń ókilderi bar saraptamalyq komıssııa Qazaqstannyń birneshe óńirlerinen túsken 165 ótinimdi qarap shyqty. Mamandar konkýrsqa túsken jumystardy bıznes-sheshimniń suranysqa ıeligi, básekelestik boıynsha artyqshylyǵy, kommertsııalyq áleýeti jáne usynystardy ázirleýshiler komandasynyń biliktiligin eskerip baǵalady. Qorytyndysynda eń úzdik 4 startap joba iriktelip alyndy.

1. E-queue - elektrondyq kezek qyzmetin kórsetý jónindegi onlaın servıs;

2. SHOPPY.KZ - fýlfılment qyzmetin qosa kórsetetin áleýmettik shoppıng portaly (dástúrli dúkenderdi tolyq súıemeldeýdi uıymdastyrý)

3. BARAKAT MENU - qoǵamdyq tamaqtandyrý oryndarynyń ıelerine servıs jasaý; ózine ózi elektrondyq qyzmet kórsetý júıesi, mobıldi qurylǵylardaǵy sandyq mázir;

4. AION CONNECT - WebRTC tehnologııasynyń negizinde IP telefonııasynyń servısi.

Jeńimpaz komandalar óz ıdeıalaryn iske asyrýǵa jol ashatyn aqshalaı syıaqy alýmen qatar, eń bastysy sheteldik úzdik mamandardan dáris alýyna múmkindik týady. Bul konkýrs bıylǵy jyly tuńǵysh ret ótkizilip otyr, al keleshekte jyl saıyn ótkiziletin bolady.