Astanada osy aıdan bastap jylý tarıfi 20 paıyz ósti

ASTANA. QazAqparat – Ulttyq ekonomıka mınıstrligi Tabıǵı monopolııalardy retteý komıtetiniń departament basshysy Qanat Qulnazarov elordada jylý tarıfteri 1 shildeden bastap qalaı ózgergenin baıandady, dep habarlaıdy QazAqparat tilshisi.

«Jylýmen jabqytaý salasynda tabıǵı monopolııanyń úsh sýbektisi jumys isteıdi. Bul – jylý energııasyn óndiretin «Astana-Energııa» AQ, jylýdy taratatyn «Astana-Teplotranzıt» AQ jáne jylýmen jabdyqtaıtyn «Astanaenergosbyt» JShS.

«Astana-Energııa» AQ-nyń tarıfi eńbekaqy shyǵyndaryn 892 mln teńgege ulǵaıtýmen, gaz, kómir, mazýt sııaqty strategııalyq taýarlardy satyp alý shyǵyndaryn 5,8 mlrd teńgege ósirýmen, jylý óndirý kóleminiń 31%-ǵa artýymen jáne strategııalyq taýarlardyń qymbattaýymen baılanysty túzetildi. Ózgeris mólsheri – 23%, 1 GKal energııanyń quny - 1 837,2 teńgeden 2 261,5 teńgege ósti», - dedi ol.

Departament basshysy jylýmen jabdyqtaý tarıfi de artqanyn aıtady.

«Astana-Teplotranzıt» AQ-nyń tarıfi eńbekaqy shyǵyndaryn 631 mln teńgege ulǵaıtýmen, elektr qýatyna jumsaıtyn shyǵynnyń 359 mln teńgege jetýimen, jergilikti ákimdikterden qaıtaryp alǵan jelilerdi kútip ustaý shyǵyndaryn 180 mln teńgege deıin ósirýmen, jelilerdi rekonstrýktsııalaýǵa 1,1 mlrd teńge qosymsha ınvestıtsııa salýmen baılanysty ósti. Demek, tarıf 230,4 teńgege, 1 GKal energııanyń quny 1 236,5 teńgeden 1 466,8 teńgege deıin ulǵaıdy.

«Astanaenergosbyt» JShS-niń sýmen jabdyqtaý tarıfi eńbekaqy shyǵyndarynyń 180 mln teńgege artýyna, jylý energııasyn satyp alý shyǵyny 4 mlrd teńgege kóbeıýine, jylýdy taratý shyǵyndary 2,5 mlrd teńgege ósýine baılanysty ózgerdi. Sonda jylý tarıfiniń jıyntyq ózgerisi halyq úshin 20% ósti», - dedi Qanat Qulnazarov.