Astanada Oralhan Bókeı oqýlary bastaldy
Jalpy, dástúrge aınalǵan Oralhan Bókeı oqýlaryna 16-22 jas aralyǵyndaǵy talapkerler qatystyrylady. Baıqaý erejesine saı, úmitker adam oqıtyn monologtyń uzaqtyǵy 2-3 mınýttan aspaýy qajet ári úmitker monolog pen shyǵarma úzindisin jatqa bilýi tıis. Jarystyń úsh tapsyrmasyn oryndaǵan, atap aıtsaq, prozanyń, dramalyq shyǵarmanyń úzindisin jáne bir óleńdi mánerlep oqyǵan qatysýshylar qazylar alqasynyń tarapynan tıisti baǵasyn alyp, jeńimpaz baldyq kórsetkish boıynsha anyqtalady.
Sh.Shaıahmetov atyndaǵy Tilderdi damytý respýblıkalyq úılestirý-ádistemelik ortalyǵynyń dırektory Erbol Tileshovtiń aıtýynsha, búgingi baıqaýǵa zııaly qaýym ókilderi men ǵalymdar tórelik etedi.
«Oralhan Bókeı oqýlary elimizdiń óńir-óńirinde sáýir aıynda bastalǵan bolatyn. Tamyzda biz oblystyq jáne qalalyq baıqaýlardyń jeńimpazdarynan osy respýblıkalyq jarysqa ótinish qabyldaı bastadyq. Bıylǵy Oralhan Bókeı oqýlarynyń jeńimpazdaryn tek tústen keıin anyqtaımyz. Al, jalpy, qatysyp jatqan balalardyń boıynan talanat pen talpynysty baıqaý qıyn emes. Jalpy, qazir jastar kitap oqymaıdy degen áńgime jıi aıtylady. Oqýshylar kitap emes, ınternetke júginedi. Árıne, bul zaman talaby shyǵar, biraq, kitap esh ýaqytta umytylmaıdy. Búgingi baıqaýdyń maqsaty da sol - kitap ár ýaqytta adamnyń rýhanı azyǵy bolyp qala beretinin dáleldeý», - deıdi E.Tileshov.
Qazaqtyń qadirli jazýshysy Oralhan Bókeıdiń dúnıeden ozǵanyna bıyl 22 jyl boldy. Sýretker jazýshy, daryndy jýrnalıst tiri bolǵanda, 28 qyrkúıek kúni 72 jasqa tolar edi. Qazaq ádebıetiniń erekshe klassıgi Oralhan Bókeıdiń «Qaıdasyń qasqa qulynym?», «Bizdiń jaqta qys uzaq», «Uıqym kelmeıdi» syndy áńgimeler jınaǵy men povesteri mektep oqýshylarynan bastap, eresekter de únemi qyzyǵa, kózge jas ala oqıtyn shyǵarmalar bolyp qala bermek. Oralhan Bókeı 1993 jyly týǵan jerinen jyraqta, Úndistannyń Delı qalasynda dúnıeden ozǵan bolatyn.