Astanada óńirlik jol qurylymdaryn damytý máselesi talqylanyp jatyr

ASTANA. QazAqparat - El aımaqtaryndaǵy joldardy salý jáne jóndeý máselelerine arnalǵan «Óńirlik jol qurylymdaryn damytýdy sheshý joldary» atty halyqaralyq ǵylymı-praktıkalyq konferentsııa óz jumysyn bastady, dep habarlaıdy QazAqparat tilshisi.

Sharaǵa elimizdegi avtomobıl jol qurylystaryna qatysty jáne jaýapty uıymdarmen qosa, Reseı, AQSh, Frantsııa jáne Germanııa elderiniń ókilderi qatysýda. Konferentsııada sala mamandary óz elderindegi jol qurylymyna qatysty tájirıbemen bólisip, ınnovatsııalyq jańashyldyqtaryn ortaǵa saldy.

Búginde elimizde qoldanystaǵy avtomobıl jolynyń uzyndyǵy - 95,6 myń shaqyrym. Onyń 24,4 myń shaqyrymy - respýblıkalyq mańyzy bar, al 71, 2 myń shaqyrymy - jergilikti avtojol jelileri. 

«2015-2019 jyldarǵa arnalǵan «Nurly jol» memlekettik baǵdarlamasy aıasynda bizdiń mınıstrlik avtojoldar, transport jáne azamattyq avıatsııa salalarynda birqatar jobalardy júzege asyrýda. Negizinen avtomobıl joldaryn salý men qaıta jóndeý jumystaryna mán berýdemiz. Atalǵan memlekettik baǵdarlama aıasynda 2015-2017 jyldary respýblıka boıynsha І jəne ІІ deńgeıdegi tehnıkalyq kategorııalarǵa jatatyn 5,9 myń shaqyrym jol salyndy jáne jóndeýden ótti. Sonyń ishinde aıtyp óterlik iri jobalardyń biri -  Batys Eýropa-Batys Qytaı transporttyq dáliziniń ashylýy», - dedi QR Investıtsııalar jáne damý vıtse-mınıstri Roman Sklıar.
 

Onyń aıtýynsha, atalǵan jumystarǵa 932,4 mlrd teńge qarajat bólindi, onyń 472,8 mlrd teńgesi ulttyq qordan qarjylandyryldy. Odan bólek, atalǵan jobalardy júzege asyrý kezinde 80 myń adam jumysqa tartyldy, sondaı-aq jol jelilerine paıdalanylǵan qurylys materıaldarynyń 95% - otandyq ónimder.

Sonymen qatar, vıtse-mınıstr ústimizdegi jyly respýblıkalyq mańyzy bar avtomobıl joldaryn salý men jóndeý baǵytynda 23 jobanyń júzege asyrylǵanyn, sonyń negizinde 4,6 myń shaqyrym jol paıdalanýǵa berilgenin aıtyp ótti. Ol jobalarǵa bıýdjetten 232,4 mlrd teńge qarjy bólingen jáne jyl sońyna deıin taǵy 528 shaqyrym avtojol ashylady.

«Qazirgi ýaqytta elimizde jergilikti mańyzy bar joldarǵa bólingen qarjy kólemi - 155,9 mlrd teńge. Onyń  64,3 mlrd teńgesi respýblıkalyq bıýdjetten qarastyrylǵan. Bul qarajatqa óńirlerdegi jalpy uzyndyǵy 4373 shaqyrymdy quraıtyn avtomobıl joldaryna jóndeý jumystary júrgiziledi. Onyń ishinde 232 shaqyrym jol jańadan salynady jáne qaıta jóndeýden ótedi, al qalǵan 4141 shaqyrym avtojolǵa kúrdeli jáne orta deńgeıdegi jóndeý jumystary júrgiziledi»,- dedi ol. 
 

Buǵan deıin Astanada «Qazavtojol- Kaztraffic-2018» XV halyqaralyq kórmesiniń ashylǵanyn habarlaǵan bolatynbyz.