Astanada oqýshylar áskerı ushaqtyń tizginine otyrdy

NUR-SULTAN. QazAqparat - Elordalyq №54 mektep-lıtseı oqýshylaryna avıatsııalyq tehnıkany kórsetýmen áskerı-patrıottyq taqyrypta erekshe sabaq uıymdastyryldy. Tanymdyq sharany Ulttyq ulan 3656 áskerı bóliminiń (avıatsııalyq eskadrılıa) áskerı qyzmetshileri Táýelsizdiktiń 30 jyldyq mereıtoıy aıasynda uıymdastyrdy.

Negizgi qyzmettik-jaýyngerlik mindetterden basqa ulandyqtar qaramaǵyndaǵy áskerı patrıottyq klýbtarmen jáne orta bilim mekemeleriniń oqýshylarymen osyndaı is-sharalardy jıi ótkizedi.

Ashyq sabaqty uıymdastyrý úshin avıatsııa parkiniń aýmaǵy tańdalýy kezdeısoq emes. Oǵan Nur-Sultan qalasy №54 mektep-lıtseıiniń 7-9 synyp oqýshylary qatysty.

Ashyq sabaqtyń negizgi maqsaty – óskeleń urpaqtyń boıynda Otanǵa degen súıispenshilik pen adaldyq sezimin oıatý, Ulttyq ulanda qyzmet etýdi nasıhattaý, sondaı-aq avıatsııalyq tehnıkamen tanystyrý boldy.

Ulttyq ulan eskadrılıasynyń áskerı qyzmetshileri oqýshylarǵa avıatsııalyq tehnıkany, radıobaılanys júıeleriniń jumysyn, qozǵaltqyshty, elektr jabdyqtaryn jáne ushaqtar men tikushaqtardyń jumys qabilettiligin kórsetti.

- Jas urpaq úshin mundaı ashyq sabaqtar - naǵyz mereke. Biz áýejaıdy aralap, áskerı avıatsııalyq tehnıkany óz kózimizben kóre alǵanymyzǵa qýanyshtymyz. Mundaı sharalar jastardy patrıotızm men batyldyq sııaqty qasıetterdi tárbıeleýge kómektesedi dep oılaımyn, - deıdi synyp jetekshisi Saǵynysh Raısqyzy.

Mektep oqýshylary ashyq sabaqqa rıza boldy, tek uldar ǵana emes, qyzdar da áskerı ushaqtyń elektrondy jabdyqtaryn basqara aldy jáne tikushaqtyń tizgininde otyrdy.

- Aıta ketý kerek, bizdiń oqýshylardyń Ulttyq ulannyń áskerı qyzmetshilerimen mektep oqýshylarynyń mundaı kezdesýleri birinshi ret uıymdastyrylyp otyrǵan joq. 3656 áskerı bólimi men 54 mektep-lıtseıi arasyndaǵy memorandýmnyń jasalýy jas urpaqtyń boıynda óziniń Qarýly Kúshterimen maqtanysh sezimin qalyptastyrýǵa múmkindik beredi, -deıdi sabaq jetekshisi, 3656 áskerı bólimi komandıriniń tárbıe jáne áleýmettik -quqyqtyq jumystar jónindegi orynbasary, podpolkovnık Serik Álimbekov.

Ashyq sabaq sońynda balalardyń kópshiligi áskerı ushaqtardyń ushqyshy bolǵysy keletinin bildirdi, al olardyń keıbireýleri keıin óz ómirin Ulttyq ulan qatarynda Otandy qorǵaýmen baılanystyrǵysy keletinin jetkizdi.