Astanada oqýshylar arasynda avtorlyq áskerı-patrıottyq ánder baıqaýy ótti

ASTANA. QazAqparat - Astana qalasy №70 mektep-lıtseıinde Uly Jeńistiń 70 jyldyǵyna arnalǵan «Jeńis týy jelbire!» atty І qalalyq avtorlyq áskerı-patrıottyq ánder baıqaýy ótti. Baıqaýǵa Astana mektepteri jáne kolledjder qatysty. Іrikteýden 12 oqýshy ótti, dep habarlady Astana qalasy ákimdiginiń baspasóz qyzmetinen.

Baıqaýdyń maqsaty - aty ańyzǵa aınalǵan qazaq halqynyń batyrlary, Halyq qaharmandarynyń erlikke toly ómirin úlgi etý. Sonymen qatar, oqýshylar avtorlyq óleńderdi shyǵarý arqyly ózderiniń shyǵarmashylyǵyn shyńdaı túsedi, Otanǵa degen súıispenshiligi artyp, patrıottyq sezimi damıdy. Sharany uıymdastyrýshy - Bilim basqarmasy, Qorǵanys isteri jónindegi departamenti, «Ar-namys» jedel izdestirý qyzmeti ardagerleriniń» Respýblıkalyq qoǵamdyq birlestigi, №70 mektep-lıtseıi. Bul baıqaýda QR mádenıet qaıratkeri, Qurmet belgisi ordeniniń ıegeri, Ybyraı Altynsarın atyndaǵy tósbelginiń ıegeri, Halyqaralyq Respýblıkalyq baıqaýlardyń laýreaty aqyn sazgeri Ospan Súleımenuly, Qazaqstan Respýblıkasynyń Qarýly kúshteriniń ardageri genaral-maıor Marat Nagýmanov tórelik etti. Baıqaýda «B. Momyshulyna arnaý» ánimen, erekshe sózimen, taqyrypqa saı kompozııatsııasymen bas júldeni ıelengen №70 mektep-lıtseı oqýshysy Álekbaı Jambyl. Bul ánniń ereksheligi, sózin jazǵan ánshiniń ózi boldy. Baıqaýda №64 mektep -lıtseıdiń «Alaý» trıosy I oryn aldy, №16 mektep-gımnazııasy «Pobedıtelı» ánimen (avtory, oryndaýshy Kızıma Nıkıta) jáne «Fotografııa v gazete» ánimen №30 MG (sózi: Rımma Kazakova, oryndaýshy Jakan Damına, Karman Ernat) ekinshi orynda, №22 MG «Naslednıkı Pobedy» ánimen (avtory, oryndaýshy Voronenko Andreı) jáne «Alǵa, qazaǵym» ánimen «Danalyq» kolledjiniń stýdenti (avtory, oryndaýshy Nurjeńis Joldabaı) III orynda.