Astanada oqýshyny tegin tamaqtandyrý quny 116 teńgege artady
Búgin elordada ákimniń kásipkerlermen kezdesýinde mektep oqýshylaryn ystyq tamaqpen qamtamasyz etýmen aınalysatyn áleýmettik bıznes ókilderi ózderiniń problemasyn aıtty.
«Balalardyń tamaǵynan bólinetin qarajat qunyn kóterý – ózekti másele. Qazir qosylǵan qun salyǵyn eskere otyryp, bir balaǵa arnalǵa birrettik tamaqtaný quny 584 teńgeni qurady. Bul soma azyq-túlikpen qamtamasyz etý turǵysynan jetkiliksiz», – deıdi kásipkerler.
Óz kezeginde elorda ákimi jaqynda bir balaǵa bólinetin qarajat somasy artatynyn aıtty.
«Jaqyn arada máslıhat qaraýyna tıisti qujatty engizemiz. Bul turǵyda ár balaǵa arnalǵan qarajat 700 teńgege deıin jetedi», – dedi J. Qasymbek.
Sondaı-aq Astana qalasynyń Bilim basqarmasy mektep oqýshylaryna arnalǵan jańa as máziri daıyndalǵanyn málim etti.
«Ár óńirde mektep oqýshylaryna qarastyrylǵan qarajat somasy birkelki emes. Biz birneshe kezeńmen atalǵan somany ósiremiz. Bastapqyda 700 teńgege deıin jetkizemiz. Budan keıin taǵy bir esepteýler bolady», – dedi qala ákimi.
Jaqynda Astana qalasynyń bilim basqarmasy basshysynyń orynbasary Serik Ádilbekov oqýshylardy tamaqtandyrý aınalasyndaǵy máselege qatysty túsinik bergen edi.