Astanada núktelik qurylysqa qarsy kúres júrip jatyr

ASTANA. QazAqparat - Astanada núktelik qurylysqa qarsy kúres júrip jatyr. 20-ǵa jýyq ýchaskede kóppáterli turǵyn úı keshenderiniń ornyna áleýmettik nysandar - mektepter, emhanalar, qoǵamdyq keńistikter (gúlzarlar, jelekjoldar, aýlalar), balabaqshalar paıda bolady. Bul týraly Astana ákimi Jeńis Qasymbek málim etti, dep habarlaıdy QazAqparat.

«Qalada osyndaı 22 nysan bar. Barlyq nysannan habarymyz bar. Olar boıynsha kórshi úılerdiń turǵyndarynyń bastamashyl toptarymen jáne qurylys salýshylardyń ókilderimen belsendi jumys isteımiz. Qazir eki nysannyń isi sotta, qalǵandary boıynsha sheshim bar. Ýchaskeler turǵyndardyń pikirin eskere otyryp, áleýmettik nysandardy salý úshin paıdalanylatyn bolady.

Mysaly, Esil ózeniniń jaǵasynda, Kosygın kóshesiniń aýdanynda Egjeı-tegjeıli josparlaý jobasyna ózgerister engizildi, kóppáterli turǵyn úı keshenderi gúlzarǵa aýystyryldy, «Copenhagen» TK aýdanynda kóppáterli turǵyn úı kesheni alańǵa aýystyryldy. «Nova city» TK aýdanynda kóppáterli turǵyn úı kesheni bilim berý ortalyǵyna, «Qalalyq romans» TK aýdanynda - mektepke jańa ǵımaratqa, balabaqsha men skverge jáne t.b. aýystyryldy», - dedi Jeńis Qasymbek.

Sondaı-aq, Astana ákimi bıyl qańtar aıynan bastap ınjenerlik jelilersiz jáne bas josparsyz qurylysqa ruqsat berilmeıtinin atap ótti.

Sonymen qatar, eger qandaı da bir qurylys kompanııasy qurylysty tehnıkalyq sharttardyń tolyq paketinsiz jalǵastyrsa, qurylys ýchaskelerindegi jumys tolyǵymen toqtatylady jáne kompanııa josyqsyz kompanııalardyń «qara» tizimine engiziledi.