Astanada Naýryzdy jańa formatta toılaý bastaldy

ASTANA. QazAqparat - Alǵashqy merekelik sharanyń qonaǵy kóp balaly jáne az qamtylǵan otbasylar, balalar úıi tárbıelenýshileri men múgedek balalar boldy, dep habarlaıdy QazAqparat QR Mádenıet jáne sport mınıstrligine silteme jasap.

«Qazaqstan» kontsert zalynda ótken «Ulystyń uly kúni» atty merekelik sharasynda teatrlandyrylǵan qoıylym jáne ulttyq dástúr men ádet-ǵuryptar kórsetilip, sondaı-aq, ulttyq sporttyq oıyndar oınatyldy.

Sonymen qatar, qazaq folklorynyń ertegi keıipkerleri Er Tóstik, Aldar kóse, Shyqbermes Shyǵaıbaı jáne Tazsha bala merekelik keshtiń sánin keltirdi.

Odan bólek, aıtýly sharaǵa elimizge tanymal sahna juldyzdary qatysyp, óz ónerlerin ortaǵa saldy. Olardyń qatarynda Altynbek Qorazbaev, Roza Rymbaeva, Jeńis Seıdýllauly, Jubanysh Jeksenuly, Dosymjan Tańatarov, Qurmash Mahanov, Tóreǵalı Tóráli jáne taǵy basqalar bar.

Sol sııaqty kesh qonaqtary naýryz kójeden aýyz tıip, balalarǵa táttiler úlestirildi.

Aıta ketsek, QR Mádenıet jáne sport mınıstri Arystanbek Muhamedıuly Áz-Naýryzdy jańa formatta toılaýdyń ýaqyty kelgenin aıtqan bolatyn.

«Endi zaman talabyna saı Naýryzdyń formatyn túbegeıli ózgertý qajet. Naýryzdyń aıryqsha tálim-tárbıe, qadir-qasıet beretin túrleri óte erekshe. Sondyqtan, Naýryz meıramyna jańa reńk berý úshin, adamnyń ultyna, dinı baǵynystylyǵyna qaramastan, adamgershilik qundylyqtarǵa mán bere otyryp, Qazaqstan halqy túgel qamtylatyndaı mazmunyn jasaý kerek», - dedi ol.