Astanada Naýryz meıramyn toılaý aıasynda 300-den astam merekelik shara uıymdastyrý kózdelgen

ASTANA. QazAqparat - Astana qalasynda Naýryz meıramyn merekeleý aıasynda 13-25 naýryz aralyǵynda 300-den astam merekelik shara uıymdastyrý kózdelgen. Bul týraly búgin Ortalyq kommýnıkatsııalar qyzmetinde ótken brıfıngte Astana qalasy ákimdigi Іshki saıasat basqarmasynyń basshysy Bolat Tilepov aıtty.

"Bul sharalardy mazmuny jaǵynan úsh topqa bólýge bolady. Birinshisi - rýhanı-ıdeologııalyq sharalar. Bul bloktyń sharalary ádette 21-22 naýryzda bolatyn basty merekelerge deıin ótedi. Atap aıtqanda bul qalamyzdaǵy barlyq mekemelerde, uıymdarda jáne oqý oryndarynda naýryzdyń qundylyqtaryn dáripteıtin úlkendi-kishili sharalar. Ekinshisi - áleýmettik mańyzdy sharalar. Bıylǵy baǵdarlamada 16 áleýmettik joba bar. Onyń ishinde jaǵdaıy tómen otbasylarǵa, jalǵyzbasty zeınetkerlerge materıaldyq kómekten bólek, qarttar úıinde, múgedekter emhanasynda merekelik dastarhan basynda túrli qoıylymdar kórsetý, sonymen birge tsırkte, qalamyzdaǵy barlyq kınoteatrlarda jetim jáne ata-ananyń qamqorlyǵynsyz qalǵan balalarǵa tegin kórsetilimder kórý sııaqty bastamalar bar. Úshinshisi - mádenı-shyǵarmashylyq sharalar. Olar barlyq merekelik demalys kúnderi qalamyzdaǵy ashyq jáne jabyq alańdarda ótetin bolady", - dep atap ótti B. Tilepov.

Onyń aıtýynsha, bul kúnderi qala halqyna da saýda ortalyqtarynda, oıyn-saýyq oryndarynda 10%-dyq jeńildiktermen qatar, merekelik baǵdarlamalar da kórsetiledi.