Astanada Naýryz meıramy qalaı toılanady
21 naýryzda Astanada kóktemniń shýaqty merekesi Naýryz meıramyna oraılastyrylǵan halyqtyq serýen bastalady. Elordada alty alańda kıiz úıler tigilip, etnoaýyldar ashylady. Kelýshiler merekelik kontsertti tamashalap, qazaq kúresi, arqan tartys, gir kóterý, asyq atý jáne armrestlıng sııaqty ulttyq sport túrlerinen kúsh synasady. Astana turǵyndary men qonaqtary baýyrsaq, palaý, naýryz kóje, irimshik taǵamdarynan dám tatyp, altybaqan tebedi. Jalpy, Naýryz meıramyna oraı Astanada 50-ge jýyq kıiz úı men 10-nan astam altybaqan ornatylady.
Sonymen qatar, 22 naýryzda ashyq alańdarda da jalpyqalalyq sharalar ótedi. Basty merekelik sharalar Qazaqstannyń Táýelsizdigine 25 jyl monýmentiniń janyndaǵy alańda (EKSPO aýdany), ákimdiktiń aldyndaǵy Qalalyq alańda, Qazaq Eli monýmentiniń aldyndaǵy alańda, Jetisý saıabaǵynda, «Jastar» saraıynyń aldyndaǵy alańda jáne «Jastar» teatrynyń janynda (eski vokzal aýmaǵy) uıymdastyrylady.
Naýryz meıramy kúnderi elorda turǵyndary men qonaqtary ulttyq etnoaýyldan basqa, EKSPO kórme kesheniniń aýmaǵyndaǵy taqyryptyq mýzeı-kıiz úılerdi, ulttyq salt-dástúrlerdi, teatrlandyrylǵan qoıylymdardy, aıtys pen qazaqstandyq estrada juldyzdarynyń jáne qalalyq shyǵarmashylyq ujymdardyń qatysýymen ótetin kontsertterdi tamashalaı alady. Budan basqa, kelýshiler qyshshylardyń, zergerlerdiń, kıiz basý men sándik-qoldanbaly óner sheberleriniń qoldan jasalǵan buıymdarymen tanysady.
Qala mańyndaǵy turǵyn alaptarynda da halyqtyq serýender formatynda merekelik sharalar uıymdastyrylady. 18-22 naýryz aralyǵynda Kazgorodok (№55 OM), Óndiris (№49 OM), Jeleznodorojnyı, Internatsıonalnyı, Mıchýrıno, Promyshlennyı, Prıgorodnyı («Hozıaıýshka» dúkeniniń aldyndaǵy alań, Novyı aeroport k-si), Úrker, (№69 mektep-gımnazııasynyń aldyndaǵy aýmaq), Kóktal-1 («Naz» Memlekettik bı teatrynyń aýmaǵy), Kóktal-2 (№68 OM) turǵyndary Ulystyń Uly kúnin toılaıdy. Budan basqa, «7-ıA», «Aqbulaq taýn», «Qaınar», «Apato», «Dostar», «Salamat», «Zerde» turǵyn úı keshenderiniń aýlasynda merekelik baǵdarlamalar uıymdastyrylady.
Bıyl Astanada Naýryz meıramy qurmetine iri sporttyq sharalar ótedi. 21 naýryzda saǵat 21:00-de «Astana arena» stadıonynda fýtboldan Eýropa Chempıonaty-2020 (EURO-2020) irikteý tsıkly aıasynda Qazaqstan men Shotlandııa qurama komandalarynyń kezdesýi ótedi.
Sondaı-aq, merekege oraı Qazaq kúresinen alǵash ret shyǵarmashylyq ókilderi arasynda «Óner Barysy» respýblıkalyq týrnıri uıymdastyrylady. Buryn habarlanǵandaı, dúbirli doda 21 naýryzda saǵat 14:00-de «Dáýlet» sport kesheninde ótedi. Elimizge tanymal artıster men mýzykanttar boz kilemge shyǵyp, beldesedi. 20-dan astam palýannyń ishinde birde bir kásipqoı sportshy joq. Ánshiler, aıtyskerler, akterler, KTA-ǵa qatysýshylar ulttyq sport túrinen sheberlik baıqasady. Qaırat Nurtas, Abaı Aıazbaev, Serik Ibragımov, Meıirjan Tórebaev, Amangeldi Óteshov, Asylhan Tólepov, Artýr Tólepov, Aıan Ótepbergen, Nurlan Musaev, Erkebulan Daıyrov, Álibek Serǵalıev, Nurbolat Abdýllın, Ardak Baıǵabyl, Ǵalym Mahambetov, Aqbolat Ótebaı, Syrymbet Bıbosynov, Hamıt Erdehan jáne basqalary kúsh synasady.
Sonymen qatar, 24 naýryzda Naýryz meıramyna oraı Esil ózeniniń jaǵasynda qalalyq trıatlon-parkte Astana Nauryz Marathon iri qaıyrymdylyq sporttyq sharasy ótkiziledi. Jarys jolyna shyqqan 1000 asa adam tórt dıstantsııaǵa júgiredi, kásipqoılar - 21 km, áýesqoılar - 10 km, endi ǵana júgire bastaǵandar - 5 km, balalar men jas sportshylar - 500 m.
Marafon aqyly, oǵan qatysý úshin myna silteme boıynsha tirkelý qajet.