Astanada Naýryz merekesine oraı velomarafon ótti

ASTANA. QazAqparat - 21 naýryz kúni «Saryarqa» velotreginiń aýmaǵynda Jastar jylyna arnalǵan «Naýryz meıramy» velomarafony ótti, dep habarlaıdy QazAqparat.

Sharany QR Mádenıet jáne sport mınıstri Arystanbek Muhamedıuly ashyp berdi. Ol jarystyń basty maqsaty - buqaralyq sport túrlerin damytý, ony halyq arasynda tanymal etý jáne salaýatty ómir saltyn qalyptastyrý ekenin atap ótti.

Erler arasynda 1-oryndy Erjan Ómirqul ıelendi, 2-oryn Danııar Quttybekke buıyrsa, 3-oryn Andreı Kreıstiń enshisinde. Áıelder arasynda 1-oryn Anastasııa Lartsovaǵa buıyrdy, 2-oryndy Jansaıa Ábdýkárimova ıelendi, 3-oryn ıegeri - Lázzat Ramazanova.

Barlyq qatysýshylar aldyn ala jasalǵan baǵyt boıynsha 6 shaqyrym júrip ótti. Sonymen qatar, shara aıasynda armrestlıng, asyq atý, toǵyzqumalaq, kúres, gir kóterý boıynsha sportshylar óner kórsetti. Sondaı-aq, qazaqtyń eski salty boıynsha tusaý kesý rásimi ótti.