Astanada Naýryz merekesinde saýda oıyn-saýyq ortalyqtarynda baýyrsaq taratylyp, Naýryz kóje quıylady

ASTANA. QazAqparat - Astana qalasynyń turǵyndary men qonaqtary úshin «ASIA PARK», «Mega Astana», «Kerýen», «Han Shatyr» jáne «Saryarqa» saýda oıyn-saýyq ortalyqtarynda «Naýryz meıramy-2014» oraılastyrylǵan merekelik is-sharalar men aktsııalar ótedi. Bul qalalyq Kásipkerlik jáne ónerkásip basqarmasy habarlady, dep jazady elorda ákimdiginiń resmı saıtynda.

22 naýryzda «ASIA PARK» saýda oıyn-saýyq ortalyǵyna kire beriste ulttyq oıyndar uıymdastyrylyp, sporttyq jarystar ótedi. Sondaı-aq, kelýshilerge arnalǵan merekelik kontsert te bolady.

«Mega Astana» SOO Naýryz kúnderi kıiz úı jabdyqtarynyń kórmesi ótedi, kópshilikke baýyrsaqtar, palaý, naýryz kóje usynylady, qolónershiler jármeńkesi jáne qaıyrymdylyq kórme-jármeńke uıymdastyrylady. Sonymen qatar, elorda turǵyndary men qonaqtaryna arnalǵan teatrlandyrylǵan qoıylym kórsetiledi, altybaqan ornatylady. Orkestr óz ónerin ortaǵa salady, akvagrım, balalarǵa arnalǵan sheberlik synyptary, qýyrshaqtar teatry, ulttyq bılerdi úıretý, sondaı-aq, kontserttik baǵdarlama qoıylady. Al saýda oıyn-saýyq ortalyǵyn jalǵa alýshylar merekelik jeńildikter jasamaq.

«Kerýen» SOO basty kireberisinde Nurjol jelegi jaǵynan kıiz úıler qoıylady, al úshinshi qabatta qazaq qolónershileriniń ulttyq kórme-jármeńkesi ótedi, onda ulttyq kıimder, aspaptar, áshekeıler men kádesyılar satylady.

«Han-Shatyr» SOO 1-qabattaǵy atrıýmda kıiz úıler ornatylady. Sondaı-aq ulttyq aspaptar orkestri óz ónerin ortaǵa salyp, ulttyq bıler festıvali ótedi. Sonymen qatar, kelýshiler baýyrsaq pen Naýryz kójeden dám tatady.

«Saryarqa» SOO kontserttik baǵdarlama, qoıylymdar jáne balalar men eresekter arasynda baıqaýlar uıymdastyrylady, merekelik aktsııalar ótkizilip, jeńildikter jasalady, kelýshilerge tátti-dámdiler taratylady.