Astanada «Nashaqorlyqty sportqa aıyrbasta» aktsııasy ótip jatyr
Aktsııa aıasynda elordalyq sportshylar ótip bara jatqandarǵa elektrondy temekini sporttyq qural-jabdyqtarǵa aıyrbastaýdy usyndy. Іs-shara Saryarqa aýdany ákimdiginiń, Dene shynyqtyrý jáne sport basqarmasy men Jastar saıasaty máseleleri basqarmasynyń qoldaýymen uıymdastyryldy.
«Búgingi kúni aktsııa aıasynda biz temeki jáne veıp shegetin jastarǵa qoldaryndaǵy zııandy zattardy boks qolǵabyna, dopqa, týrnıketke aıyrbastaýdy usynamyz. Osylaısha, biz elordalyqtardy salaýatty ómir saltyna shaqyra otyryp, qalamyzǵa, tabıǵatymyzǵa degen jaqsy kózqarasqa tartamyz», - dedi Astana qalasy Jastar saıasaty máseleleri basqarmasynyń basshysy Samat Ibraev.
Elordalyq kıokýshınkaı-kan karateshi Álıhan Asýbaev ta mundaı sharalardyń mańyzdylyǵyn atap ótip, jastardy sportpen aınalysýǵa shaqyrdy.
«Osy aktsııa arqyly biz jastarǵa sportpen shuǵyldanyp, densaýlyqtaryn kútý kerektigin kórsetkimiz keledi. Biz birge olardy durys jolǵa salǵymyz keledi. Bizdiń áreketimiz kópshilikke motıvatsııa bolady dep senemiz», - dedi Álıhan Asýbaev.
Elorda máslıhatynyń depýtaty, «Jastar rýhy» jastar qanatynyń tóraǵasy Arslanbek Maǵzumnyń aıtýynsha, aktsııanyń maqsaty jastar men jasóspirimderdi kinálaý emes, zııandy ádetterden bas tartýǵa shaqyrý.
«Qazir biz teris tendentsııany baıqap júrmiz. 25 jasqa deıingi jastar arasynda elektrondy temekiniń keń taralýy baıqalady. Bul másele óte ózekti. Sondyqtan búgingi maqsatymyz – jaman ádetterden arylý úshin birigip jumys isteý», - deıdi Arslanbek Maǵzum.
Depýtattyń aıtýynsha, mundaı sharalar buǵan deıin de elordada bolǵan.
«Bir aı buryn ataqty qazaqstandyq sportshy Vasılıı Tahtaımen birge osyndaı aktsııa júrgizgen bolatynbyz. Aldaǵy ýaqytta mundaı sharalardy jalǵastyramyz. Oń nátıje kórip otyrmyz. Mysaly, jastar uıymdarynyń keıbir belsendi jigitteri osyndaı aktsııalardy ótkizdi», - dep bólisti Arslanbek Maǵzum.
Máslıhat depýtaty aktsııa barysynda jınalǵan elektrondy qurylǵylar mamandandyrylǵan zaýytta joıylatynyn aıtty.
Búgin Memleket basshysy veıpke tyıym salatyn zańǵa qol qoıǵanyn habarlaǵan bolatynbyz.