Astanada náresteni qoldan múgedek etti dep aıyptalǵan dárigerler tekserilip jatyr

ASTANA. QazAqparat – Elordalyq áıel balasynyń múgedektigine dárigerlerdi kinálady. Qazir dárigerlerdiń ústinen qyzmettik tekseris júrip jatyr, dep habarlaıdy QazAqparat tilshisi.

Astanalyq áıel óz shaǵymyn áleýmettik jelide anonımdi túrde qaldyrǵan.

Jazbada aıtylǵandaı, júkti áıel bıyl 12 tamyzda elordanyń №1 kópbeıindi aýrýhanasynyń gınekologııa bólimine túsken.

Aıtýynsha, dárigerler patsıenttiń ótinishine qulaq aspaı, jumysyna nemquraıly qaraǵan. Osylaısha dárigerlerdiń salǵyrttyǵynan balam múgedek bolyp qaldy dep shaǵymdanady ol.

«Bosanǵannan keıin ulym reanımatsııada - 10 kún, patologııada - 10 kún jatty. Olar balany óte kóp márte rentgenge túsirdi. Men ulymnyń oń qolyn burap alǵanyn baıqadym. Dıagnoz –oń qoldyń sal aýrýy Dıýshen-Erba. Bul - akýsherlik paralıch. Náresteniń ıyǵynan tartqanda onyń júıkesine zaqym kelgen. Balama endi ómir boıy ońaltý men jattyǵý qajet bolady. Ulymnyń deni saý bolǵan. Júktilik kezinde dárigerdiń nusqaýlyǵyn oryndap, tekserýge ýaqytynda bardym. Meniń kópten kútken sábıim dárigerlerdiń kinásinen múgedek boldy», - dep jazdy avtor.

Atalǵan jaıtqa Astana qalasy qoǵamdyq densaýlyq saqtaý basqarmasy resmı túsinik berdi.

«Qazir atalǵan jaǵdaıdyń mán-jaıyn anyqtaý úshin qyzmettik tergeý júrgizilip jatyr. Eger ótinishte kórsetilgen faktiler rastalsa, kináliler jaýapqa tartylady», - deıdi vedomstvodan.