Astanada N.Nazarbaev atyndaǵy Eýrazııalyq fızıka ortalyǵyn qurý jobasy tanystyryldy
Bul joba Jerortateńizdik irgeli fızıka ınstıtýtynyń ǵylymı dırektory, professor Alekseı Kavokınniń basshylyǵymen júzege asyrylýda.
Ortalyq ǵylymı jáne bilim jobalaryn jasaýmen jáne júzege asyrýmen aınalysady, Alekseı Kavokınniń aıtýynsha, ol Qazaqstan ekonomıkasynyń damýyna jáne gúldenýine úlken yqpal etedi. Sondaı-aq ortalyq qyzmeti baǵyttarynyń ishinde balamaly energııa kózderin, kvanttyq jáne aqparattyq tehnologııalardy jasaý jumystary da bar.
«Ortalyqtyń Astana men Rımde eki shtab-páteri bolmaq. Olardyń arasynda óte tyǵyz yntymaqtastyq ornatylady. Mysalǵa, Qazaqstannyń jas ǵalymdary, aspıranttary Rımde jetekshi eýropalyq fızık ǵalymdardyń basshylyǵymen birneshe aı oqýdan, taǵlymdamadan ótedi. Budan keıin olar ózderiniń ýnıversıtetterine oralyp, turaqty oqytýshylyq qyzmetpen aınalysady», - dep áńgimeledi Alekseı Kavokın.
Onyń aıtýynsha, Qazaqstanda sondaı-aq eki-úsh aıǵa álemdik bedeldi ǵalymdar kelip, respýblıka joǵary oqý oryndarynda dáris oqıdy.