Astanada myńdaǵan adam Naýryz meıramyna arnalǵan halyqtyq serýenge qatysýda

ASTANA. QazAqparat - Búgin Astanada tańerteńnen bastap Naýryz meıramyna arnalǵan halyqtyq serýen ótip jatyr. Jalpyqalalyq sharalarǵa myńdaǵan elorda turǵyny men qonaqtary qatysýda, dep habarlaıdy Astana qalasynyń mádenıet jáne sport basqarmasy.

 Astanalyqtarǵa arnalǵan merekelik sharalardyń biri elorda ákimdiginiń aldyndaǵy Qalalyq alańda uıymdastyryldy. Munda kóktem merekesine oraı dástúrli jabdyqtarmen jabdyqtalǵan ádemi kıiz úıler tigildi. Jastar men eresekter altybaqandar tebýde. Búrkit, tazylar men tóbetter kórmesi kelýshilerdiń erekshe qyzyǵýshylyǵyn oıatty.

Merekelik alańda arqan tartý, asyq atý syndy ulttyq sport túrlerinen jarystar ótýde. Budan basqa, jınalǵan qaýym armrestlıng pen gir kóterýden kúsh synasýda.
  

Elorda turǵyndary men qonaqtaryna naýryz kóje,  baýyrsaq pen palaý taratylýda. Sonymen qatar, qoǵamdyq tamaqtaný oryndary ashyldy.

Elordanyń Memlekettik akademııalyq fılarmonııasynyń ujymy, Jańabaı Ótegenov, Gúlnur Orazymbetova, Ásem Omarova, Ǵanı Jumasheva, Aleks Fılatov, Nurǵalı Turlybekov, Maral Kamı, Qarlyǵash Ádilbekova syndy vokalıster, «Saryarqa», «Dabyl», «Dıart», «Dáýir», «Barys» toptary, baıanıst-vırtýoz Baǵjan jáne basqa da belgili artıster qonaqtardyń nazaryna merekelik kontsert qoıdy.

Munymen qosa, dástúrli merekelik halyqtyq serýen «Stýdenttik» saıabaqta da ótip jatyr.

Munda kıiz úılerdiń janynda qazaq halqynyń salt-dástúrleri men ádet-ǵuryptary kórsetildi, saıabaqtyń sahnasynda Kúláıym Qaıyrbaeva, Mádına Beısehanova, Aınur Ábdıeva sııaqty belgili vokalısterdiń, elordanyń Memlekettik akademııalyq fılarmonııasy ártisteriniń, balalar ujymdarynyń, belgili vokaldyq toptardyń qatysýymen kontsert ótkizilip, sondaı-aq, Naýryz meıramyna arnalǵan teatrlandyrylǵan qoıylymdar kórsetilýde.
 

Saıabaq aýmaǵynda sporttyq arena ornatylyp, onda tańerteńnen beri elimizdiń aımaqtarynan kelgen sportshylardyń qatysýymen qazaq kúresinen saıystar ótkizilýde, jeńimpazdarǵa baǵaly syılyqtar tartý etiledi.

Sonymen qatar, kelýshilerdiń barlyǵy arqan tartý, asyq atý, armrestlıng pen gir kóterýden jarystarǵa qatysýda.