Astanada múgedekterdiń teń múmkindikterin qamtamasyz etý taqyryby qozǵaldy

ANA. 25 qarasha. QazAqparat /Jasulan Amanbaıuly/ - Búgin Astanadaǵy EQYU ortalyǵy, QR Adam quqyqtary jónindegi ýákil jáne Danııanyń Adam quqyqtary jónindegi ınstıtýty uıymdastyrýymen «Múgedekterdiń qazirgi qoǵamǵa yqpaldasýy: teń quqyqtar - teń múmkindikter» degen taqyrypta semınar ótti.

Semınarǵa Astanadaǵy EQYU ortalyǵy, Danııanyń Adam quqyqtary jónindegi ınstıtýty, memlekettik organdar, qoǵamdyq uıym ókilderi, múgedekter men otandyq sarapshylar qatysty. Olar múgedekterdiń quqyqtaryn qorǵaý, olardyń qoǵam ómirine erkin aralasyp, yqpaldasýy jáne memlekettik zańdaryn halyqaralyq konventsııalarmen ımplementatsııalaý tóńireginde talqylaý júrgizdi.

«Búgingi tańda álemdegi adamdardyń 10 paıyzyna jýyǵy, shamamen 650 mıllıonǵa tarta adam múmkindigi shekteýli adamdardyń sanatynda sanalady. QR Eńbek jáne halyqty áleýmettik qorǵaý mınıstrliginiń málimetterine sáıkes, Qazaqstanda 488 myń múgedek bar. Bul statıstıka múgedekterdiń qoǵam ómirine ońaı sińisýine naqty qandaı sharalar jasaý kerek degen suraqtarǵa jaýap izdeýge mindetteıdi», deıdi Astanadaǵy EQYU ortalyǵy jetekshisiniń orynbasary Jannet Klettser.

Onyń aıtýynsha, ol úshin Qazaqstanda memlekettik organdardyń, qoǵamdyq uıym ókilderiniń, múgedekterdiń, jumyspen qamtý jáne múgedekterdi kásibı túrde mashyqtaý ortalyqtarynyń ózara tıimdi qarym-qatynasyn shıryqtyra túsý kerek.

«Ásirese atalǵan kontekstte adam quqytaryn saqtaý mindetterin barynsha tıimdi oryndaý úshin ákimshilik júıeniń ishinde vedomstvoaralyq ózara is-qımyldyń ilgeri jumys jasaýy asa mańyzdy», dep atap kórsetti ol.

Jıyn sońynda qatysýshylar múgedekterdiń teń quqyqtaryn saqtaý jáne olarǵa arnalǵan ınfraqurylym jaıynda usynystar daıyndap, memlekettik quzyrly organdarǵa baǵyttady.