Astanada múgedek jandarǵa arnalǵan jobalar jarysy ótip jatyr
«Tel-Avıv ýnıversıtetiniń dostar qaýymdastyǵy 2016 jyldan bastap Qazaqstan aýmaǵynda meıkatondy iske asyryp keledi. Qazir biz 14-inshi meıkatondy ótkizip jatyrmyz. Astanada qalalyq jastar saıasaty basqarmasynyń qoldaýymen besinshi ret ótip jatyr. Fınalǵa elimizdiń túrli aımaǵynan 10 komanda shyqty. Qatysýshylardyń jasy 13-ten joǵary. Búgingi saıysqa 10 prototıp usynyldy. Solardyń arasynda parahokkeımen aınalysýǵa arnalǵan shana bar. Sondaı-aq, bizdiń jobaǵa paralımpıadashylar da qatysady. Olar ózderine parahokkeıden álem chempıonatynda kıetin shana jasaıdy», - dedi joba menedjeri Evgenııa Mnaıdarova.
Odan bólek, meıkaton qatysýshylary qolǵa arnalǵan protez, bachamen aınalysý úshin qyzdarǵa arnalǵan arba, taǵy sol sııaqty dúnıelerdi jobalaǵan.
«Bizdiń jigitter zaǵıp jandar úshin avtobýsty taný júıesin jasady. Júıege taıaq jáne kózildirik kiredi. Kózildirik avtobýs nómirin oqıdy jáne qulaqqappen sóıleıdi. Bul balalar jasaǵan synaq úlgisi. Búgingi shara úsh kúnge sozylady. Aldymen joba qatysýshylary óz ıdeıalary men jobalaryn tanystyrady», - deıdi ol.
Joba menedjeriniń aıtýynsha, meıkaton - múgedekterdiń ómirin jeńildetetin quraldar oılap tabatyn komandalar jobasy. Olardyń maqsaty – múgedek jáne erekshe kútimdi talap etetin jandardyń turmysyn jeńildetý.
«Bizdiń komanda ınformatıka pániniń muǵalimderinen quralǵan. Biz álemge meıirim syılaǵymyz keledi. Bul bizdiń – maqsat. Keıde biz adamdarǵa kómegimizdiń keregin baıqamaı jatamyz. Bir azamattyń ótinishimen biz qolǵa arnalǵan protez jasadyq. Bizdiń maqsat – jeńý emes, kómekke muqtaj jandarǵa qol ushyn sozý. Biz jasaǵan protezdiń balamasy 3 myń dollar turady. Al biz ony 100 myń teńgege jasap shyǵardyq», - deıdi Ulytaý oblysynan kelgen HI-TECH komandasynyń múshesi Altynaı Sultanǵalı.
«Meıkaton - komandalar arasyndaǵy básekelestik emes. Mańyzdysy, qatysýshylardyń «Men adamdarǵa qalaı kómektese alamyn?» degen nıetinde. Bul jer ózara qoldaý men dostyqtyń atmosferasy. Biz bul jerge belgili bir adamnyń máselesi men qajettiligi sheshý úshin jınalyp otyrmyz. Barlyq qatysýshylarǵa sáttilik tileımin», - dedi Tel-Avıv ýnıversıtetiniń dostar qaýymdastyǵynyń vıtse-prezıdenti Sanııa Arapova.
Saıystyń júlde qoryna kelsek, birinshi oryndy jeńip alǵan komandanyń ár qatysýshysyna 120 myń teńgeniń sertıfıkaty, ekinshi oryn ıelerine 80 myń teńge jáne úshinshi oryn jeńimpazdaryna 60 myń teńgeniń sertıfıkaty tabys etiledi.