Astanada «Men kórgen álem, meniń shabytty ómirim» І Respýblıkalyq baıqaýdyń jeńimpazdary marapattaldy
Kórkemsýret baıqaýyna respýblıkanyń balalar úıleri men ınternat mekemeleriniń tárbıelenýshileri qatystyrylǵan bolatyn. Baıqaý sáýir aıynda jarııalanysymen eldiń túkpir-túkpirinen balalardyń jumystary kóptep túse bastady. Qazylar qaraýyna barlyǵy 224 materıal keldi. Búgin onyń 16 jeńimpazy uıymdastyrýshylar atynan dıplomdar men sertıfıkattarǵa, baǵaly syılyqtarǵa ıe boldy.
Qazaq ulttyq óner ýnıversıtetinde ótken shara barysynda baıqaýǵa qatysýshylardyń kórkemsýretteriniń kórmesi uıymdastyryldy. Óz jumystary arqyly balǵyndar Astanany, Qazaqstandy sýretteýge, ózderiniń shyǵarmashyl kózqarastarymen álemdi, ómirdi kórsetýge tyrysqan.
Sharaǵa «Bolashaq» qaýymdastyǵy keńesiniń tóraǵasy Baýyrjan Baıbek, Qazaq ulttyq óner ýnıversıtetiniń rektory Aıman Musaqojaeva jáne kórkemóner salasyndaǵy basqa da belgili adamdar qatysty.
«Bolashaq» qaýymdastyǵy balalar úıilerimen tyǵyz qarym-qatynas jasaýda. Ásirese balǵyndardyń qabiletterin damytý baǵytynda túrli sharalar uıymdastyrýǵa den qoıyp kelemiz», - deıdi B. Baıbek.
Onyń aıtýynsha, jas talanttar úshin Astanada úsh kún boıy este qalarlyqtaı túrli is-sharalar ótkizelmek. Onyń ishinde balalarǵa beıneleý ónerinen sheberlik sabaqtar uıymdastyrylyp, olar qaladaǵy mádenı oryndardy aralaıtyn bolady.