Astanada «Men AEF-2018-ge baramyn» konkýrsynyń jeńimpazdary marapattaldy

ASTANA. QazAqparat - Astanada 17-19 mamyr aralyǵynda ótetin XI Astana ekonomıkalyq forýmy aıasynda «Men  AEF-2018-ge baramyn» konkýrsynyń jeńimpazdaryn resmı marapattaý rásimi ótti, dep habarlaıdy QazAqparat tilshisi.

Konkýrstyń sharttary boıynsha, qazaqstandyq áleýmettik jeli qoldanýshylary ózderiniń jeke paraqshalarynda AEF-ke ne úshin barǵylary keletindikteri týraly mátindik jazbalar nemese forýmnyń resmı heshtegteri qoıylǵan beınerolıkter jarııalady.

«Uıymdastyrýshylar áleýmettik jeli qoldanýshylary arasynda konkýrs uıymdastyrýǵa bastamashylyq etti. Konkýrsqa qatysýshylar áleýmettik jelidegi paraqshalaryna #menAEF-2018-gebaramyn heshtegimen jazbalar jarııalady. Memleket basshysy jyl saıyn álemdegi, Qazaqstandaǵy protsessterge beı-jaı qaramaıtyn jastarǵa erekshe kóńil bólip keledi», - dedi AEF uıymdastyrý komıtetiniń ókili Dınara Joldaspaeva.

Sondaı-aq, ol qazylar alqasynyń jumystardyń ishinen eń qyzyqty, erekshe bes jumysty tańdap alǵanyn atap ótti. Aıta keteıik, qazylar alqasynyń quramyna AEF uıymdastyrý komıtetiniń ókili Dınara Joldaspaeva, telejúrgizýshi Láılá Sultanqyzy, bloger Ǵalym Baıtýk kirgen.

Konkýrsta Halyqaralyq bıznes jáne kommýnıkatsııalar kolledjiniń stýdenti Aıgerim Tasbolat (Almaty), Jas Otan jastar qanatynyń ókili Aıgerim Serikjanova (Astana), Mıras ýnıversıtetiniń stýdenti Sonar Erjan (OQO), PHD doktory, Qazaq memlekettik qyzdar pedagogıkalyq ýnıversıtetiniń muǵalimi Shaıhıslam Laıshanov (Almaty), Ońtústik Qazaqstan memlekettik pedagogıkalyq ýnıversıtetiniń stýdenti Nadıra Syrlybaeva (OQO) jeńimpaz atandy.

Olar AEF-2018-ge tegin qatysý múmkindigine ıe boldy.