Astanada mektep formasy men oqý quraldary jármeńkesi ótip jatyr
«Jármeńke úshinshi jyl uıymdastyrylyp otyr, ata-ana jáne kásipkerler tarapynan da suranys bar. Bıyl jármeńkege shamamen 70 astanalyq kásipker qatysyp jatyr, olar mektep oqýshylaryna arnalǵan barlyq zatty usynady. Elorda ákimdigimen birlese kele, naryqtaǵy baǵadan tómen satýǵa kelistik, 10-15%-ǵa arzan deýge bolady», - dedi «QazExpoCongress» ulttyq kompanııasy basqarma tóraǵasynyń birinshi orynbasary Dáýlet Qýandyquly.
«Kids EXPO. Balalar álemi» ataýymen ótetin jármeńke úsh kúnge (16-18 tamyz) sozylady. Kelýshiler saýda jasaýmen qatar, balalarǵa arnalǵan oıyn-saýyq baǵdarlamasyn, shahmattan sheberlik saǵattary, shyǵarmashylyq stýdııalardyń qoıylymdaryn tamashalaı alady.
«Jármeńkege egiz qyzymmen keldim, formaǵa mektep tapsyrys beredi, biz oqý quraldaryn alýǵa keldik. Baǵa ártúrli, ata-ana shamasyna qaraı tańdaıdy, bireý 5 myń teńge turatyn rıýkzak alsa, endi bireý 50 myń teńgege alady. Qaltasyna qaraıdy, qazirgi balalar ózderi tańdap alǵysy keledi, al ata-anaǵa salsa arzanyn alady. Men balalaryma erik berdim, ózderi tańdap, unaǵanyn alady», - deıdi elorda turǵyny Nazgúl Qasymhanova.
Sondaı-aq jármeńkeni uıymdastyrýshylar arnaıy aktsııalar men jeńildikter bolatynyn aıtyp otyr.
«Búgingi jármeńkede bir balama rıýkzak pen oqý quraldaryn tegin berdi, negizi úsh balam mektepke barady. Bir balaǵa mektepke daıyndaýǵa formasy men oqý quraldaryn qosa alǵanda shamamen 60 myń teńge jumsalady, úsh balama 150-160 myń teńge qajet. Byltyrǵa qaraǵanda baǵa ósken, bazarda arzandaý, al saýda ortalyqtarynda baǵa aıyrmashylyǵy bar», - dedi astanalyq Rahııa Nurlybaeva.
Mektep jármeńkesi tańǵy saǵat 10:00-nan keshki saǵat 19:00-ge deıin jumys isteıdi.
«Ótken jylǵa qaraǵanda baǵa ósken, bir balany mektepke tolyq daıyndaýǵa shamamen 100 teńge kerek. Búgin jármeńkeniń ótetini týraly áleýmettik jeliden bildim. Endi keldik, qazir kóremiz, jalpy baǵa jyl sanap qymbattap jatyr», - dedi oqýshy balasymen kórmege kelgen Quralaı Іlııasova.