Astanada máslıhat depýtattary JEO-2 jumysymen tanysty

ASTANA. QazAqparat - Qalalyq máslıhat depýtattary Astanadaǵy JEO-2 jumysymen tanysty. Shara barysynda «Astanaenergoservıs» AQ basqarma tóraǵasy S. Esjanov jáne «Astana-Energııa» AQ basqarma tóraǵasy M. Erdembekov halyq qalaýlylaryn JEO-2 qondyrǵylarymen tanystyrdy, dep habarlady qalalyq ákimdiktiń baspasóz qyzmetinen.

Atap aıtqanda, depýtattar nomınaldyq qýaty saǵatyna 120 megaVatt bolatyn JEO-2 besinshi agregatyn jumys kezinde baqylap, keler jyly jazda iske qosylatyn, salynyp jatqan jetinshi E550 qazandyq agregatyn kórdi. Alaıda, JEO qýaty qarqyndy damyp kele jatqan elordamyzdy túgeldeı qamtýǵa jetpeıdi, sondyqtan jylýdyń bir bóligin Astana Ekibastuz JEO-dan satyp alýǵa májbúr. Erdembekovtyń aıtýynsha, ekologııalyq jaǵdaıdy jaqsartý úshin kásiporynda kúkirt qaldyqtaryn azaıtý boıynsha josparly jumystar júrgizilip, qaldyqtardy qaıta paıdalaný jónindegi jańa tehnologııalar paıdalanylyp, kúl kólemin jáne atmosferaǵa jiberiletin ár túrli qaldyqtardy azaıtyp, óńdelgen jerdi qalpyna keltirýge kóp kóńil bólinip otyr. Qalalyq máslıhat depýtaty B. Isabaev kúldi qaıta óńdeý men ony qurylys maqsatynda jáne jol salýda paıdalanýdyń mańyzdylyǵyna toqtaldy. Qazirgi kezde kúl tonnasyna 425 teńgeden satylady, bul kóptegen qurylys kompanııalary úshin tıimsiz. Qalalyq máslıhat hatshysy S. Esilovtyń aıtýynsha jylý elektr stantsııasynyń úzdiksiz jumysy qala úshin mańyzdy, sondaı-aq, qalanyń lastanýynyń 30% JEO úlesinde. Sondyqtan, bul kórsetkishti azaıtýǵa tyrysyp, kúl tógetin oryndardyń tolyp ketýine jol bermeı, L.N. Gýmılev atyndaǵy Eýrazııa ulttyq ýnıversıteti ınjenerlik fakýltetiniń ǵylymı qyzmetkerleri men stýdentterin jumysqa tartý qajet.