Astanada mamyr aıynda gaz tartý jumystary bastalady
Elordany gazdandyrý jobasy jalpy úsh kezeńge josparlanǵan. Qurylys montajdaý jumystarynyń jalpy somasy 52 mlrd teńgeni qurap otyr. Birinshi kezeńge 27 mlrd teńge qajet.
Aldymen kógildir otyn 3 Jylý elektr ortalyǵyna, sondaı-aq Kóktal-1, Kóktal-2 jáne Ońtústik-shyǵys shaǵyn aýdandaryna jetkiziletin bolady.
«Gaz qubyryn kósheler boıyna tartamyz. 7-10 úıge ortaq bir jáshik bolady. Qala mamandary kvartalishilik jeliler jasaýda, jáshikter qoıyp, esepteý quraldaryn ornatyp jatyr. Sol jerden kez kelgen azamat aldyn ala ruqsat ala otyryp, qosyla alady. Turǵyndardy qosýdyń ádistemesi osyndaı bolady», - dedi qalalyq Otyn-energetıkalyq kesheni jáne kommýnaldyq sharýashylyq basqarmasynyń basshysy Erbol Tóleýov.
Atap ótilgendeı, jobanyń ekinshi kezeńinde qaladaǵy 4 turǵyn alaby gazdandyrylady. Onyń ishinde Telman, Qalamańy shaǵyn aýdany jáne Family Village bar. Úshinshi - sońǵy kezeńde kógildir otyn Ilınka kentine jáne Shýbar shaǵyn aýdanyna tartylady. Sondaı-aq ortalyqtandyrylǵan gazǵa jańadan salynatyn kópqabatty úıler de birden qosylyp otyratyn bolady.
«Qurylys jobasynda esh ózgeris bolmaıdy. Jańa shaǵyn aýdan paıda bolsa, oǵan jeke qazandyq qosa salynady. Gaz tartý júıesin engizý arqyly jylý taratamyz. Qalanyń shetinde salynyp jatqan turǵyn jaılar osylaısha jylytý ortalyqtaryna qosylady», - dedi qalalyq Otyn-energetıkalyq kesheni jáne kommýnaldyq sharýashylyq basqarmasynyń bólim basshysy Ánýarbek Esenálıev.
Búginde Astanada 22 myńnan asa jer úı bar. Olar tabıǵı gazben 2023 jylǵa qaraı tolyǵymen qamtylmaq.
Mamandar bir jylda úsh JEO 430 mln tekshe metr gaz jaǵýy múmkin ekenin, biraq suıyq otynmen qosa, basqa da jylytý kózderi paıdalanylatynyn boljap otyr. Astanada 1 tekshe metr gaz quny 50 myń teńge shamasynda bolatyny kózdelýde.