Astanada M-1 kópiri bir aıǵa ishinara jabylady
16:16, 16 Shilde 2022
NUR-SULTAN. QazAqparat – Elorda qalalyq Kólik jáne jol-kólik ınfraqurylymyn damytý basqarmasy Polıtsııa departamenti ákimshilik polıtsııa basqarmasynyń kelisimimen M-1 kópirinde ortasha jóndeý jumystaryn bastady, dep habarlaıdy QazAqparat.
Nur-Sultan qalasy ákimdiginiń málimetine sáıkes, jóndeý 16 shilde - 15 tamyz aralyǵynda júrgiziledi. Osy ýaqytta M-1 kópiriniń Baýyrjan Momyshuly dańǵylynan bastap Máńgilik el dańǵyly - Saraıshyq kóshesi qıylysyndaǵy kólik aıyrymyna deıingi bóligi qozǵalys úshin ishinara jabylady.
«Elorda turǵyndary men qonaqtary qala joldarynda keptelis týdyrmaý úshin qozǵalys baǵyttaryn aldyn ala josparlaýy qajet. Keltirilgen qolaısyzdyqtar úshin keshirim suraımyz jáne jóndeý jumystaryn júrgizýge túsinistikpen qaraýdy suraımyz», - delingen basqarmanyń habarlamasynda.