Astanada Qyzylorda oblysy ónimderiniń jármeńkesi ótip jatyr

Astanada 16 jáne 17 qyrkúıek kúnderi Qyzylorda oblysy taýar óndirýshileriniń qatysýymen aýyl sharýashylyǵy jármeńkesi ótip jatyr, dep habarlaıdy QazAqparat elorda ákimdiginiń resmı saıtyna silteme jasap.

Qyzylorda óńirinde óndiriletin otandyq ónimdi qoldaý maqsatynda jármeńkede aýyl sharýashylyǵy taýarlarynyń arnaıy kórmesi uıymdastyrylǵan.

50 júk kóligimen 60-qa jýyq aýyl sharýashylyǵy taýaryn óndirýshiler Qyzylorda oblysynan Astanaǵa jalpy somasy 200 mln teńge bolatyn 500 tonna ónim ákeldi.

Jármeńkede 135 tonnadan astam kúrish, 10 tonna et jáne 30 tonnaǵa jýyq balyq ónimderi, 30 tonna kókónister men jemister, 260 tonna baqsha ónimderi, 3 tonna as tuzy, 10 tonna sút ónimderi, 5 tonnaǵa jýyq kondıterlik ónimder bar. Baǵalar ádettegideı naryqtan arzan.

Sondaı-aq, jármeńke alańynda Qyzylorda ártisteriniń qatysýymen kontserttik baǵdarlama ótip jatyr.

Buǵan deıin habarlanǵanyndaı, Astanaǵa óńirlerden keletin taýar óndirýshilerdiń aýyl sharýashylyǵy ónimderi jármeńkeleriniń maýsymy bastaldy. Olar 29 qazanǵa deıin ár senbi men jeksenbi kúnderi ótedi.