Astanada qymyzmuryndyq merekesi atalyp ótiledi

ASTANA. QazAqparat - Astanada Qazaq handyǵynyń 550 jyldyǵyn merekeleý aıasynda ulttyq sýsyn - qymyz merekesi atap ótilmek. «Qymyzmuryndyq» dep atalatyn shara erteń, 11 qyrkúıekte «Atameken» etno-memorıaldyq kesheninde uıymdastyrylady, dep habarlady astana.gov.kz.

Merekege nıet bildirgen jandardyń barlyǵy qatysa alady. Astana turǵyndary men qonaqtary úshin 2 kıiz úı tigilip, ulttyq kıim kıgen qyzdar qymyz, ystyq baýyrsaq pen basqa da qazaqtyń ulttyq taǵamdaryn usynatyn bolady. Ata-babamyzdan qalǵan «Tusaýkeser» salt-jorasy erekshe qazaqı atmosfera ornatpaq.

Keshen aýmaǵynda altybaqan ornatylyp, áralýan ulttyq kıim túrleri kópshilik nazaryna usynylady. Budan basqa, mal sharýashylyǵymen aınalysqan ejelgi taıpalardyń óneri negizinde qalyptasqan qazaqtyń oıýlarymen órnektelgen túıe júninen jasalǵan tabıǵı kilemder kórmesi adamdardyń qyzyǵýshylyǵyn oıatpaq. Sonymen qatar, «Qymyzmuryndyq» merekesinde búrkitshiler de óz sheberlikterin ortaǵa salatyn bolady. Kelýshiler qazaqtyń ulttyq sýsyny týraly teatrlandyrylǵan qoıylymdy tamashalaıdy.

Mereke qonaqtary arqan tartý jáne armrestlıng syndy jarystarda kúsh synasady. Sondaı-aq, qala turǵyndary qymyz ishý saıysyna qatysyp, atalǵan sýsyn týraly bilimderin ortaǵa salady.

Saǵat 11:00-18:00 deıin jalǵasatyn merekege kelýshiler qymyzdan dám tatyp, qazaqtyń ulttyq sýsynynyń tarıhymen tanysady.