Astanada kýrer mobıldi qosymshanyń qoldanýshylaryn aldap ketken
Qalanyń eki turǵyny azyq-túlikti jetkizýshi kýrerdiń aldap, aqshalaryn jymqyryp ketkeni týraly polıtsııaǵa aryzdanǵan. Almaty aýdany polıtsııa basqarmasynyń qyzmetkerleri jedel-izdestirý is-sharalaryn júrgizý barysynda azamattardy aldaǵan Shyǵys Qazaqstan oblysynyń 22-jastaǵy turǵynyn anyqtady. Ol bóten adamnyń derekterin paıdalanyp, mobıldi qosymshaǵa kýrer retinde tirkelip, jetkizý qyzmetin jeleý etip, sengish azamattardyń aqshasyn ıemdengen.
Klıentterdiń ótinishin qabyldaǵannan keıin jigit uıaly telefon teńgerimine aqsha salý retinde aldyn-ala tólemdi talap etken. Ol bir jaǵdaıda 21 myń teńge kólemindegi aqshany ıemdense, ekinshisinde 8 myń teńgeden astam qarjyny ıemdengen.
Ýáde etilgen ónimderdi almaǵan tutynýshylar kúdiktiniń uıaly telefonyna qońyraý shala almaǵan.
Atalǵan derek QR QK-niń 190-babynyń 2-bóligi (Alaıaqtyq) boıynsha sotqa deıingi tergeý amaldary júrgizilip, onyń buryn elordada jasalǵan osyǵan uqsas qylmystarǵa qatystylyǵy anyqtalyp jatyr.
Elordada aqparattyq tehnologııalardy paıdalana otyryp jasalǵan quqyq buzýshylyqtarǵa, onyń ishinde ınternet-alaıaqtyqqa qarsy is-qımyl sharalarynyń tıimdiligin arttyrýǵa baǵyttalǵan «Anti-fraud» jedel-profılaktıkalyq is-sharasy ótip jatyr. Bir táýlik ishinde elordada 15 derek tirkelip, 5 qylmys ashyldy. Sonymen qatar buryn jasalǵan 15 qylmys áshkerelenip, 8 kúdikti qylmystyq jaýapkershilikke tartyldy.
Astana qalasynyń polıtsııa departamenti azamattardy qyraǵy bolýdy, kúmándi operatsııalardan bas tartýdy jáne beıtanys adamdarǵa aqsha aýdarmaýdy eskertedi.