Astanada kreatıvti jastar festıvali ótip jatyr
Aıtýly shara jastardyń ózin-ózi tanýy men damytý ıdeologııasyn nasıhattaýdy, olardyń jeke jáne kásibı qasıetterin damytýǵa yqpal etýdi kózdeıdi. Sol sııaqty jas qazaqstandyqtardyń maqsat-múddelerine, qajettilikteri men talap-tilekterine baǵyttalǵan.
Elordada alǵash uıymdastyrylyp otyrǵan festıvalǵa 12 men 22 jas aralyǵyndaǵy 3 myńnan astam oqýshy jáne stýdent ótinim berip, onyń ishinde irikteý kezeńinen ótken 1 myńnan astam jas aýqymdy sharaǵa qatysyp jatyr.
Jastardyń aldynda túrli salada aıtarlyqtaı jetistikterge jetken, arnaıy shaqyrylǵan spıkerler - ǵylym men bilim ókilderi, tanymal blogerler men vaınerler, medıa jáne qoǵamdyq pikir kóshbasshylary, SEO, IT-startapshylar, tabysty bıznesmender sóz sóılep, óz bilim-tájirıbelerimen bólisti.
«Básekege qabiletti jas urpaqty qalyptastyrý - kez kelgen memlekettiń basty mindeti. Eger olar belsendi túrde qatyspasa, biz damý jolynda aıtarlyqtaı tabysqa qol jetkize almaımyz. Tuńǵysh Prezıdent qory talantty jastarǵa únemi qoldaý kórsetip, jastardyń ózin-ózi tanytýlaryna yqpal etetin is-sharalardy, jobalardy qoldaıdy ári belsendi túrde júzege asyrady», - dedi QR Tuńǵysh Prezıdenti qory halyqaralyq bóliminiń basshysy Álkeı Marǵulanuly.
Onyń aıtýynsha, «RocketFest» formaty sóz sóıleýshilerdiń óz aýyzdarynan qundy aqparat alyp, ózderin tolǵandyryp júrgen suraqtardyń jaýabyn bilýge múmkindik beredi.
«Keleshekte «RocketFest» festıvaliniń shekarasyn keńeıtýdi josparlap otyrmyz. Osy sekildi sharalardy elimizdiń túrli óńirlerinde ótkizý múmkindikterin qarastyryp jatyrmyz. Bolashaqta myńdaǵan jastardy jáne ІT, ǵylym men tehnologııa salalarynda álemge tanymal spıkerlerdi qatystyra otyryp festıvaldy keń aýqymda ótkizý joldaryn oılastyrýdamyz», - dep atap ótti Álkeı Marǵulanuly.
Festıvaldyń baǵdarlamasy «IT», «Áleýmettik medıa» jáne «Ǵylym» atty úsh modýlge bólindi. Olardyń árqaısysy birneshe naqty baǵyttardy qamtıdy.