Astanada QR Tuńǵysh Prezıdentiniń kúnine oraı A.Dinikeevtyń jeke sýret kórmesi ótedi

ASTANA. 13 qarasha. QazAqparat - Erteń Qazirgi zamanǵy óner murajaıynda Tatarstannyń eńbek sińirgen óner qaıratkeri Asǵat Dinikeevtyń «Dala kentavrlary» atty jeke kórmesi ótedi. Bul týraly astana.kz saıtyna murajaıdyń baspasóz qyzmetinen habarlady.

Mereıtoılyq eseptik kórmege ár jyldary túrli tehnıkada salynǵan 100-den astam eksponat qoıylady. Murajaı kollektsııasynan 8 jumys usynylady, qalǵan kartınalar A.Dinikeevtyń jeke kollektsııasynan alynǵan.

«Meni halyq motıvi jáne mıfologııa qyzyqtyrady. Ulttyq oıyndar kóbinese halyqtyń jan rýhyn jetkizedi, sol sebepti, ony óz shyǵarmashylyǵymda qoldanamyn. Tarıhı taqyryp ta men úshin jat emes. Sońǵy jyldary óz mánerimdi, oıymdy jetkizý quraldaryn tapqan sııaqtymyn. Al ónertanýshylardyń isi - bul kartınalardyń janryn anyqtaý. Sońǵy jyldary jaqsy ári jemisti jumys istep júrmin, buǵan qýanyshtymyn», - deıdi kórmeniń avtory A.Dinikeev.

Kórmede «Tuńǵysh Prezıdenttiń Astanaǵa kelýi», «Baqyt qusy», «Bolashaqqa sekirý», «Oına, syrnaı», «Men sheksiz álemde, jer sharynda, kvadratta», «Jańa qazaqtar», «Ushatyn tatar», «Sýretshi men perishteler», «Toı kúni jaqyndady», «Mýzyka», «Jaılaýǵa» jáne t.b. eńbekter kópshilik nazaryna usynylady.

Aıta keteıik, týyndylardyń basym bóligi birqatar tarıhı oqıǵalarǵa arnap salynǵan. Halyqtyń eńbegi, turmysy, salt-dástúrleri, kentavrlar, fantastıkalyq peızajdar tabıǵatpen úılesimdiliktiń kórkemdik kórinisi retinde avtordyń shyǵarmashylyǵynda erekshe oryn alady.

Asǵat Ahmetvafıeuly - Astana qalasynyń belgili sýretshileriniń biri. 1969 jyldan beri oblystyq, aımaqtyq, respýblıkalyq jáne sheteldik kórmelerge qatysady. Sýretshiniń eńbekteri elimizdiń kóptegen qalalarynda, taıaý jáne qıyr shetelderde usynylǵan.