Astanada kóshpeliler órkenıeti festıvali 3 kúnge sozylady

ASTANA. QazAqparat - Elordanyń týǵan kúninde «Han Shatyr» SOO janyndaǵy alańda dástúr boıynsha naǵyz ejelgi kóshpeliler aýyly qonys tebedi. Merekelik sharalar tizbegindegi kópten kútetin oqıǵalardyń biri «Myńjyldyqtar toǵysyndaǵy Astana» kóshpeliler órkenıeti festıvali 3 shilde kúni shymyldyǵyn ashady. Atalmysh shara shildeniń 6-syna deıin jalǵasady.

Uıymdastyrýshylar ata-babalarymyzdyń ómiri men turmys-tirshiligi jaıly baıandap beretin qanyq baǵdarlama ázirledi. Qonaqtar tańǵy saǵat 11-den keshki 22.30-ǵa deıin etnoaýyldyń kóshpeli halqynyń mádenıetiniń áralýandylyǵyn tamashalaı alady.

Qalashyqqa keletin eń kishkentaı qonaqtar úshin kireberiste kıizden alańqaı jasalady, buryn balalar osyndaı alańda oınaǵan. Osy jerde jas bilimqumarlar mereke kúnderi kıiz úı qurýdy úırenedi. Sonymen qatar, festıval qonaqtary «Kóshpeliler mýzeıin» aralaıdy, qazaq ulttyq oıyndarynan saıystarǵa qatysady. Kóshpeliler tsırki, bı ujymdarynyń óneri, dástúrli «At jalynda» atty kaskaderlik shoý, «Saıat» aýshy qustar dýmany jáne salt-joralyq, mýzykalyq folklor festıval baǵdarlamasy kórermenderin odan saıyn qyzyqtyra túspek. Al «Kostıýmder tarıhy» baǵdarlamasynda uly dala tósinde balalar kıgen kıim-keshekpen, onyń tarıhymen tanysýǵa bolady.

Ádettegideı, festıvalge Qazaqstannyń óńirlerinen ǵana emes, sonymen qatar, taıaý shetelderden de halyq qolóneriniń sheberleri keledi. Sheberlik dárister barysynda qolónershiler qarapaıym jipten oıý-órnekti kilem toqý nemese metall keseginen kózdiń jaýyn alatyn áshekeıler jasaý ónerin ortaǵa salady. Sondaı-aq olardyń eńbekterin qoldanbaly óner zattary satylatyn jármeńkeden tabýǵa bolady.

Festıvaldiń ár kúni erekshe sazdy kontsertter uıymdastyrylady. Mysaly, sharanyń ashylýynda saǵat 16.00-de ult-azattyq kóterilistiń 100 jyldyǵyna arnalǵan epıkalyq ánderdi tyńdaýǵa bolady. Al keshkesaǵat 21.30-dan 22.30-ǵa deıin qonaqtar Nurlan Ónerbaevtyń kontsertin tamashalaıdy.

Kelesi kúni qazaq halqynyń uly aqyny Jambyl Jabaevtyń 170 jyldyǵyna oraılastyrylǵan kontsert ótedi. Munda aqynnyń qanatty shabytpen dúnıege kelgen shyǵarmalaryn tyńdaýǵa bolady.

Al sharanyń sońynda kelýshiler «Júıeli sóz» dástúrli aqyndar aıtysyn tamashalaıdy.

Munymen qosa, 5 shildede saǵat 16.00-de qonaqtar úshin ataqty ánshi, kompozıtor Dánesh Raqyshevtyń 90 jyldyǵyna oraılastyrylǵan «Kúmis kómeı» dáris kontsert uıymdastyrylady. Sodan keıin saǵat 19.00 aqyndar aqtyq synda sóz jarystyrady, merekelik jyr saıysynyń qorytyndysy shyǵarylady.

Festıvaldiń sońǵy kúni jyr tóglip, kúı kúmbirleıdi. «Hassak» jáne «Saryarqa» folklorlyq-etnografııalyq ansamblderdiń kontsertinen keıin saǵat 17.00 elimizdiń Táýelsizdiginiń 25 jyldyǵyna arnalǵan epos keshi ótkiziledi. Atalmysh keń aýqymdy sharanyń shymyldyǵy dástúrli «Astana-Arqaý» túrki mýzykasy festıvalimen jabylady.

Kóshpeliler órkenıeti festıvali saǵat 20.00 «Toı tarqar» sharasymen saltanatty túrde jabylady.