Astanada kóshi-qon qyzmetiniń 95%-y avtomattandyrylǵan

NUR-SULTAN. QazAqparat – Nur-Sultan qalasynda kóshi-qon boıynsha kórsetiletin memlekettik qyzmetterdiń 95 paıyzy avtomattandyrylǵan. Jyl bastalǵaly 147 myńnan astam qyzmet kórsetildi. Bul týraly qalalyq polıtsııa departamenti kóshi-qon qyzmeti basqarmasynyń bastyǵy Arman Baımuhamet málim etti, dep habarlaıdy QazAqparat tilshisi.

«Búginde elordanyń kóshi-qon qyzmeti basqarmasy 13 túrli memlekettik qyzmet kórsetedi. Memlekettik qyzmetterdi usynýda avtomattandyrý men elektrondy nusqaǵa kóshirýge erekshe nazar aýdarylyp otyr. Sońǵy eki jyldyń ishinde taǵy 2 qyzmet avtomattandyryldy. Ol «Qazaqstan Respýblıkasynan ketýge jáne Qazaqstan Respýblıkasyna kelýge quqyq beretin vıza berý» men «Qazaqstan Respýblıkasynyń vızasyn berýge shaqyrýlardy qabyldaý jáne bekitý», - dedi Arman Baımuhamet qalalyq polıtsııa departamentinde ótken baspasóz máslıhatynda.

Onyń aıtýynsha, búginde elordada kóshi-qonǵa qatysty memlekettik qyzmettiń 95 paıyzy avtomattandyrylǵan.

«Jyl bastalǵaly kóshi-qon qyzmetiniń bólimsheleri 147 myń 336 memlekettik qyzmet kórsetti. Onyń ishinde kóshi-qon qyzmetiniń bólimsheleri arqyly – 11 486, memlekettik korporatsııa arqyly – 81 065 jáne «Elektrondyq úkimet» veb-portaly arqyly – 54 785 qyzmet usynyldy», - deıdi ol.

Buǵan deıin 6 myńnan astam shetel mıgrantyna astanada jumys isteýge ruqsat berilgeni aıtyldy.

Sonymen qatar, Nur-Sultanda kóshi-qon zańnamasyn buzǵan sheteldikter 27 mln. teńge aıyppul tólegen.