Astanada koreı taǵamdarynyń túrleri usynyldy

ASTANA. QazAqparat - Elordada koreı halqy ashanasynyń keshi ótti, dep habarlaıdy QazAqparat.

Koreı mádenı ortalyǵy uıymdastyrǵan sharada Ońtústik Koreıadan arnaıy shaqyrylǵan aspazdardyń qolynan daıyndalǵan 15-ke jýyq taǵam usynyldy.

Sonymen qatar kelgen qonaqtar koreı halqynyń «tak kanchjon», «koroldik ttokpokkı», «ıýdja-hvache», «kımchı» syndy tanymal taǵamdardan dám tatty.

Keshke qatysqan Koreıa Respýblıkasynyń Qazaqstandaǵy Elshisi Ký Hongsok osyndaı shara arqyly koreı taǵamdarynyń Qazaqstanda ǵana emes basqa da elderde tanymaldyǵy arta túsetindigin tilge tıek etti.

Shara barysynda «K-POP Cover Dance Champion» baıqaýynyń jeńimpazdary óner kórsetip, Koreıa týraly vıktorınalyq suraq-jaýap oıyny ótkizildi.

Aıta keteıik bıyl Qazaqstan men Ońtústik Koreıa arasyndaǵy dıplomatııalyq, mádenı baılanystardyń ornaǵanyna 30 jyl tolyp otyr. Osy jyldar ishinde qazaq-koreı mádenıetin nasıhattaıtyn kóptegen sharalar uıymdastyryldy.