Astanada kóppáterli turǵyn úılerde energııa únemdeý jáne termojańǵyrtý máseleleri boıynsha semınar ótýde
«Turǵyn úı-kommýnaldyq sharýashylyǵyn jańǵyrtý men damytýdyń qazaqstandyq ortalyǵy» AQ-nyń uıymdastyrýymen «Kóppáterli turǵyn úılerdegi energııa únemdeý jáne termojańǵyrtý: problemalary, olardyń sheshimderi men perspektıvalary» taqyrybynda ekikúndik respýblıkalyq semınar ótýde.
Semınar Qazaqstan Respýblıkasynyń turǵyn úı-kommýnaldyq sharýashylyǵyn jańǵyrtýdyń 2011-2020 jyldarǵa arnalǵan baǵdarlamasyn túsindirý jáne kóppáterli turǵyn úılerge jóndeý júrgizý tájirıbesimen tanysý maqsatynda ótkizilmek.
Semınarǵa qatysýǵa elimizdiń barlyq oblystary men Astana jáne Almaty qalalarynan energetıka jáne TKSh basqarmalarynyń, turǵyn úı ınspektsııasynyń, PIK qaýymdastyqtarynyń basshylary, kondomınıým obektilerin basqarý organdarynyń, basqarýshy jáne servıstik kompanııalardyń, kommýnaldyq kásiporyndardyń ókilderi shaqyryldy. Olar úshin Baǵdarlama sheńberinde jóndelgen kóppáterli turǵyn úıler boıynsha jáne Astana qalasynyń kommýnaldyq kásiporyndary men nysandaryna ekskýrsııalar uıymdastyrylyp, turǵyndarmen áńgimelesýge múmkindik jasalmaq.
«Semınardyń negizgi maqsaty osy Turǵyn úı-kommýnaldyq sharýashylyǵyn damytý baǵdarlamasy arqyly iske asyrylyp jatqan sharalardy kórsetip, ózara tájirıbe almasý», - dep atap ótti «Turǵyn úı-kommýnaldyq sharýashylyǵyn jańǵyrtý men damytýdyń qazaqstandyq ortalyǵy» AQ Bilim taratý ortalyǵynyń jetekshisi Esenbaı Islamov.
Sharaǵa qatysýshylar eń aldymen S. Seıfýllın atyndaǵy QazATÝ janyndaǵy Energııa únemdeý jáne bilim taratý ortalyǵynyń jumysymen tanysty. Odan keıin jóndeý jumystary júrgizilgen birneshe kóppáterli turǵyn úılerge at basyn tireý josparlanǵan.
Sondaı-aq, semınarǵa qatysýshylar «AstanaTeploTranzıt» AQ men «Astana Sý Arnasy» AQ bazalarynda bolyp, ondaǵy jylý jáne sýdy únemdeýge arnalǵan zamanaýı qurylǵylarmen tanysady dep kútilýde.
Erteń QR Qurylys jáne turǵyn úı-kommýnaldyq sharýashylyq isteri agenttigi Turǵyn úı sharýashylyǵy departamentiniń dırektory Vasılıı Maslov, «Turǵyn úı-kommýnaldyq sharýashylyǵyn jańǵyrtý men damytýdyń qazaqstandyq ortalyǵy» AQ basqarma tóraǵasy Tóleýtaı Raqymbekov, sondaı-aq Estonııa men Belarýs elderiniń jetekshi sarapshylary - Kinnisvarakeskkonna Ekspert OU Basqarma múshesi Meelıs Pıaaro men Turǵyn úı ınstıtýty - S.S. Ataev atyndaǵy ǴZJTQI bas dırektory Vladımır Pılıpenko syndy mamandar energııa únemdeý jáne turǵyn úı-kommýnaldyq sharýashylyǵyn damytý jaıynda baıandama jasaıdy.