Astanada kópqabatty 840 turǵyn úı kesheniniń órt qaýipsizdigi tekserildi

ASTANA. QazAqparat – 15 tamyzdan bastap, elorda aýmaǵynda «Órt qaýipsizdigi aılyǵy» júrip jatyr. Onda turǵyn úılerdegi órt qaýipsizdigin qamtamasyz etý máseleleri túsindiriledi, dep habarlaıdy QazAqparat tilshisi.

Bul týraly Astana qalasy TJD Memlekettik órt baqylaý basqarmasy bastyǵynyń mindetin atqarýshy Ajar Rústemova Astana qalasynyń kommýnıkatsııalar qyzmetindegi brıfıngte aıtty.

«Qazirgi ýaqytta Astanada turǵyn úı qory 31 myńnan asady. Olardyń basym bóligin qysqy ýaqytta peshpen jylytady. Jylytý maýsymy bastalǵansha osy peshterdi, jylytý júıelerin qalpyna keltirý týraly keńes beremiz. 15 qyrkúıekten bastap, turǵyn úıge aınaldyrylǵan úılerdi, onyń ishinde saıajaılardy qamtımyz. Onyń jalpy sany 6 myńnan asady», - dedi spıker.

Sonymen birge, TJ mamandary 15 tamyzdan bastap, áleýmettik osal toptardyń turǵyn úılerin aralap, profılaktıkalyq jumys júrgizip jatyr.

«Bul baǵytta myńnan astam úı esepte tur. Ázirge 600-den astam úıdi araladyq. Osy aldyn alý jumystary kezinde 40-tan astam kómirtegi gazyn anyqtaıtyn datchık ornattyq. Oǵan qosa, qaladaǵy záýlim ǵımarattardy da esten shyǵarmadyq. Ázirge 840 bıik turǵyn úı keshenderin tekserdik, aldyn alý sharalaryn júrgizdik, órtti boldyrmaý joldaryn túsindirdik», - dedi A. Rústemova.

Mamannyń aıtýynsha, jylytý maýsymy qarsańynda peshti tekserip, jóndep, murja joldaryn tazartý qajet. Jylytý bastalǵanda da der kezinde kúl shyǵarý, kúıeden tazartý mańyzdy.